भद्रपुर : छुट्टाछुट्टै दुर्घटनामा झापामा दुई जनाको मृत्यु भएको छ। झापाको गौरादह नगरपालिका ८ दामाबारीमा मोबाइल चार्ज गर्दा करेन्ट लागेर ६ वर्षीय बालकको ज्यान गएको छ।
त्यसैगरी दमकमा मोटरसाइकलको ठक्करबाट एक पैदलयात्रीको मृत्यु भएको छ। करेन्ट लागेर मोरङ रतुवामाई नगरपालिका घर भई हाल झापाको गौरादह ८ दामाबारी चोकस्थित मामाघर बस्दै आएका रोशन महतोको मृत्यु भएको झापाका प्रहरी नायव उपरीक्षक महेन्द्रकुमार श्रेष्ठले जानकारी दिए।
मोटरसाइकलले ठक्कर दिएर मृत्यु हुनेमा दमक नगरपालिका ५ बस्ने ४० बर्षीय पुष्कर भुजेल रहेको श्रेष्ठले बताए। प्रहरीका अनुसार दमक नगरपालिका ५ स्थित पुरानो पाथिभरा एफएम छेउको भित्रि सडकखण्डमा मे ३ प ४३०५ नम्बरको मोटरसाइकलले पैदलयात्रीलाई बुधबार साँझ ठक्कर दिएको थियो।
मोटरसाइकलको ठक्करबाट गम्भीर घाइते भएका भुजेललाई उपचारका लागि न्युरो अस्पताल विराटनगर पठाइएको थियो उनको उपचारको क्रममा मृत्यु भएको हो।
प्रतिक्रिया दिनुहोस !
