तिलाठीमा गाउँपालिका, स्वास्थ्यचौकीसहित ३ सय घर डुवानमा, प्रहरी नै विस्थापित

राजविराज : तीन दिनदेखि लगातार परेको वर्षापछि खाँडो खोलामा आएको बाढीले सप्तरीको तिलाठी कोइलाडी गाउँपालिकाको बाँध भत्काउँदा तिलाठी गाउँ डुवानमा परेको छ ।

बिहीबारदेखि नै कटान सुरु भएको बाँध शुक्रबार राति थप कटान भइ खाँडो खोलाको बाढी तिलाठी कोइलाडी गाउँपालिका–१ स्थित तिलाठी र बेल्ही बस्तीमा पसेर पूरै गाउँ जलमग्न भएको हो ।

वडा नम्बर १ का अध्यक्ष दिनेश्वर मिश्रका अनुसार खाँडो खोलाको बाढीले पुरानो बाँध भत्काइ बाढी पस्दा दक्षिण तिरका लगभग पूरै बस्ती डुवानमा परेका छन् । यस क्षेत्रका कम्तिमा तीन सय घर डुवानमा परेको गाउँपालिकाले जनाएको छ । पानीको बहाव निरन्तर बढ्दै गएपछि बस्तीमा पसेको पानीले डुवानमा परेका पाँचवटा घर भत्किएको विपद् जोखिम न्युनिकरण अधिकृत राजेश झाले जानकारी दिए ।

कटान भएको बाँध मर्मत सम्भारका लागि गाउँपालिकाले बोरा र जाली उपलब्ध गराए पनि निरन्तरको वर्षा र पानीको तिव्र भेलले बाँध मर्मत सम्भार हुन सकेको छैन । दशगजामा निर्माणाधिन पुलको तीन फिट माथिबाट पानी बग्न थालेपछि पुलको दुबै तिर डोरी बाँधेर डोरीको सहारामा स्थानीयबासीलाई आवतजावत गराइरहेको सशस्त्र प्रहरी बलका एसपी खेम थापाले जनाए । उद्धारका लागि वडा नम्बर ४ र ५ मा दुई वटा रबरबोट तयारी अवस्थामा राखेको बताइएको छ ।

प्रहरी पनि विस्थापित
वर्षाका कारण तिलाठी प्रहरी चौकीबाट प्रहरी समेत विस्थापित भएका छन् । विस्थापित प्रहरीलाई सुरक्षित स्थानमा स्थानान्तरण गरिएको जिल्ला प्रहरी कार्यालयले जनाएको छ ।

खाँडो नदीमा आएको बाढीले तिलाठी प्रहरी चौकी, भन्सार कार्यालय, स्वास्थ्य केन्द्र, गाउँपालिका र वडा नम्बर १ को कार्यालय समेत डुवानमा परेको छ । खाँडो खोलाको बाढीले तिलाठीस्थित राजबिराज–कुनौली सडक खण्डमा सवारी साधन ठप्प भएको छ । बाढी बढेपछि गाउँपालिकाले वडा नम्बर ४ का महिला, बालबालिका र ज्येष्ठ नागरिकलाई राजेन्द्र देवकी मावि कोइलाडी स्कुलमा र वडा नम्बर ५ को. बर्साइनका महिला, बालबालिका र ज्येष्ठ नागरिकलाई उच्च बाँधमा सार्ने तयारी भइरहेको गाउँपालिका अध्यक्ष सतिशकुमार सिंहले बताए ।

अध्यक्ष सिंहले पानीजन्य प्रकोप फैलिन नदिन आइतबारदेखि स्वास्थ्य संयोजकको टोली परिचालित गर्ने जनाएका छन् । विपद् व्यवस्थापनको पूर्व तयारीका लागि लाइफ ज्याकेट, रेस्क्यु डोरी, डुङ्गा तयारी अवस्थामा राखिएको विपद जोखिम न्युनिकरण अधिकृत झाले बताए । झाका अनुसार पीडामा छटपटिएकी एक गर्भवती महिलालाई तिलाठीबाट र लडेर घाइते भएका लौनियाका एक ज्येष्ठ नागरिकलाई लोखरमबाट उद्धार गरी राजविराजस्थित गजेन्द्रनारायण सिंह अस्पताल पठाइएको छ ।