मुस्ताङ : वारागुङ मुक्तिक्षेत्र गाउँपालिका १ लुप्रा–पान्डा खोलामा निर्माणाधीन पक्की पुल ७ वर्षपछि सम्पन्न भएको छ। पुल बनेपछि बिहीबारदेखि सवारीसाधन सञ्चालन भएको छ।
विगत १ वर्षदेखि पुलमा कुनै काम भएको थिएन। पुलको काम १० प्रतिशत सक्न बाँकी थियो। पुलमा माटो फिलिङ, इन्सपाइसन जोइन, एप्रोज सडक र एप्रोज स्लाब लगायतका काम थाँती नै थिए।
करिडोर सडक र मुस्ताङका जनप्रतिनिधिको दवावपछि निर्माण कम्पनीले पुलप्रति चाँसो देखाएको हो।
लुप्रा–पान्डा खोलामा पुल नहुँदा बर्खायामको समयमा मुक्तिनाथ दर्शन गर्ने र उपल्लो मुस्ताङ जाने सवारी तथा यात्रुलाई सास्ती हुने गरेको थियो।
पुलमा दोहोर आवतजावत सहज भएपछि मुक्तिक्षेत्र जाने सवारीलाई सजिलो भएको छ। राष्ट्रिय गौरवको आयोजना बेनी–जोमसोम–कोरला सडकखण्ड अन्तर्गत मुस्ताङमा करिडोरले १ दर्जन बढी पुलको काम थालेको छ।
लुप्रा–पान्डा खोला पुल काम थालेको ७ वर्ष बिते पनि यो मुस्ताङमै पहिलो पक्की पुल सम्पन्न भएको जनाइएको छ। बारागुङकै अर्को उपल्लो मुस्ताङ जोड्ने छुसाङ पक्की पुल पनि अन्तिम चरणमा छ।
भारतीय नाकाबन्दी र हिउँदयाममा काम गर्न अप्ठ्यारो हुने भएकाले पनि समय लम्बिएको कम्पनीका प्रतिनिधि सुदिप कार्कीले बताए। पुलको औसत लम्बाई ५० मिटर र चौडाई ७ मिटरको छ। यस्तै लुप्रा–पान्डा खोला बग्ने क्षेत्रको लम्बाई फराकिलो भएकाले थप २ वटा ढलान कल्र्बट र ग्याबिनले घेरेर थप १ सय ९० मिटर माटो फिलिङ गरिएको कार्कीले बताए।
ढिलै भए पनि पुल निर्माण भएपछि मुक्तिनाथ र उपल्लो मुस्ताङको यात्रा सहज भएको छ। विगतमा पुल नहुँदा यातुङ मेलामा जाने स्थानीय र मुक्तिनाथ जाने तिर्थालुले चर्को शुल्क तिरेर ट्याक्टरमार्फत खोलो वारपार गर्नुपर्ने बाध्यता थियो।
प्रतिक्रिया दिनुहोस !
