पहिरोमा परिवार गुमाएका कुमारलाई गाउँपालिकाको राहत

भोजपुर : पहिरोमा श्रीमती र दुई छोरा गुमाएका रामप्रसाद राई गाउँपालिका ५ मानेभञ्ज्याङ तुन्ताङका कुमार राईको परिवारलाई गाउँपालिकाले राहत वितरण गरेको छ। पीडित राईलाई गाउँपालिकाले जनही २५ हजारका दरले ७५ हजार र आवास निर्माणका लागि २० हजार गरी ९५ हजार राहत रकम हस्तारन्तरण गरेको हो।

प्राकृतिक विपदमा परिवार गुमाएका पीडितलाई सहयोगी भावनाले राहत रकमसहित पाल र खाद्यान्न हस्तान्तरण गरिएको गाउँपालिका अध्यक्ष विजय राईले बताए। 'गुमेका परिवारलाई फर्काउन त सकिँदैन। तर पीडित परिवारलाई केही सान्त्वना मिलोस् भन्ने चाहना हो,' अध्यक्ष राईले भने, 'पीडित परिवारलाई अन्य निकायबाट पनि सहयोग तथा राहतका लागि पहल गरेका छौँ।'
 

गत असार २८ गते पहिरोले पुरिएर राईकी ३६ वर्षीया श्रीमती मनकुमारी राई, १७ वर्षीय छोरा शिवकुमार राई र १५ वर्षीय छोरा शक्तिकुमार राईको मृत्यु भएको थियो। पहिरोमा परी भोजपुरमा अहिलेसम्म ५ जनाको मृत्यु, ३ जना घाइते १ सय घरपरिवार विस्थापित भएका छन्। जसमध्ये १६ घर पूर्णरुपमा र ५८ घरमा आंशिक क्षति पुगेको छ।