झापा : झापाको दमकमा युवाहरूका दुई समूहबीच झडप हुँदा एक जनाको मृत्यु भएको छ। घटनामा दुईजना घाइते भएका छन्।
दमक वडा नम्बर १ दुर्गामन्दिर पछाडि भृकुटी टोलमा २५–३० जनाको समूहमा रहेका युवाको दुई समूहबीच झगडा हुँदा धारिलो हतियार प्रहारबाट दमक २ का मानबहादुर सुब्बाका छोरा १९ वर्षीय विक्रम लिम्बुको मृत्यु भएको प्रहरीले जनाएको छ।
घटनामा घाइते भएका दमक २ का विक्रम भण्डारीको लाइफलाइन अस्पताल दमकमा उपचार हुन नसकेपछि विराटनगर रेफर गरिएको छ भने अर्का घाइते दमक ३ का सुजन भुजेलको लाइफलाइन अस्पतालमा उपचार भइरहेको जिल्ला प्रहरी कार्यालय झापाका प्रहरी नायब उपरीक्षक महेन्द्रकुमार श्रेष्ठले जानकारी दिए।
यसअघि हिजो पनि सोही समूहका युवाको झगडा भएको स्थानीयबासीले बताएका छन्। बुधबार पनि बिहानैदेखि सो ठाउँमा युवाहरू भेला भएका र अपरान्ह ४ बजेतिर दुई समूहबीच झगडा हुँदा छुरी हानाहान भएको श्रेष्ठले बताए।
प्रतिक्रिया दिनुहोस !
