नयाँदिल्ली : भारतमा मुस्लिम महिलालाई एकैपटक दिइने तीन तलाक रोक्न बनाइएको विधेयक यहाँको राज्यसभाबाट पारित भएको छ । राज्यसभामा मुस्लिम महिला (विवाह अधिकार संरक्षण) विधेयकका पक्षमा ९९ मत परेका थिए भने विपक्षमा ८४ मा परेको थियो । उक्त विधेयकमा मतदान हुँदा बहुजन समाज पार्टी (बसपा), जनता दल यूनाइटेड (जदयू), पीडीपी, टीआरएस, एआईएडीएमके जस्ता दलले बहिष्कार गरेका थिए ।
तीन तलाक विधेयकको समर्थन गर्दै आएको कंग्रेस आईलाई ती दलले साथ नदिएपछि विधेयक राज्यसभाबाट पारित भएको हो । भारतीय राष्ट्रपतिबाट अनुमोदन भएपछि उक्त विधेयकले कानुनको मान्यता पाउनेछ । केन्द्र सरकारले २१ फेब्रुअरीदेखि अध्यादेश जारी गर्दै तीन तलाक विधेयकलाई मान्यता दिएको थियो ।
उक्त विधेयकमाथिको संशोधन प्रस्ताव पनि १०० का विरुद्ध ९४ मतले असफल भएको थियो । कंग्रेसले विशेष समितिमा लगेर छलफल गराउनुपर्ने भन्दै संशोधन प्रस्ताव पेश गरेको थियो । राज्यसभामा तीन तलाक विधेयक पारित हुनुलाई सरकारको ठूलो सफलता मानिएको छ । लोकसभामा सत्तारुढ भारतीय जनता पार्टी (भाजपा)को पूर्ण बहुमत भए पनि राज्यसभामा अल्पमत छ । फेब्रुअरीमा पनि लोकसभाबाट बहुमतले पारित उक्त विधेयक राज्यसभामा अल्पमतमा परेको थियो ।
केन्द्रीय कानुनमन्त्री रविशंकर प्रसादले तीन तलाकबारे बहस गर्दै मुस्लिम धर्मगुरु मोहम्मद पैगम्बरले पनि यसमा प्रतिबन्ध लगाएको बताए । रविशंकरले हिन्दु विवाह विधेयक समेत कयौं कानुनमा परिवर्तन गरिएको चर्चा गरे । सन् १९५५ मा हिन्दु विवाह कानुनमा पतिको उमेर २१ र पत्नीको उमेर १८ वर्ष हुनुपर्ने बनाइएको बताए । यो नियम उल्लंघन गर्नेलाई २ वर्ष र पत्नी जीवित छँदै दोस्रो बिहे गरे ७ वर्ष जेल सजाय हुने व्यवस्था छ ।
कुप्रथाको अन्त्य : मोदी
राज्यसभामा तीन तलाक विधेयक पारित भएलगत्तै भारतीय प्रधानमन्त्री नरेन्द्र मोदीले लैंगिक न्याय र समानताको जित भएको बताए । उनले मध्यकालीन कुप्रथा अन्त्य गर्न सकेको भन्दै खुशी व्यक्त गरेका छन् । मोदीले लेखेका छन्, ‘तीन तलाक विधेयक पारित हुनु महिला सशक्तिकरणको क्षेत्रमा ठूलो कदम हो । तुष्टिकरणका नाममा करोडौं आमा र दिदीबहिनीलाई अधिकारबाट वञ्चित गरेर पाप गरिएको थियो । मुस्लिम महिलालाई हक दिलाउने अवसर मेरो सरकारलाई मिलेको छ ।
यसबाट म गौरवान्वित छु ।’ उक्त विधेयक पारित गर्न सहयोग गर्ने सबैलाई मोदीले धन्यवाद दिएका छन् । यसैगरी भाजपा अध्यक्ष एवं गृहमन्त्री अमित शाले पनि भारतमा नयाँ दिन शुरु भएको बताएका छन् ।
प्रतिक्रिया दिनुहोस !
