युवा खेलाडीकासाथ लय समात्दै श्रीलंका

कोलम्बो : श्रीलंकाले बंगलादेशविरुद्धको एक दिवसीय सिरिज क्लीनस्वीप गरेको छ । घरेलु मैदानमा खेलेको तीन एकदिवसीय सिरिजमा तीनै वटामा जित हात पार्दै श्रीलंकाले ३–० ले श्रृंखला क्लीनस्वीप गरेको हो। 

अघिल्ला दुई खेल जित्दै श्रृखला आफ्नो पक्षमा पारिसकेको श्रीलंकाले बुधबार भएको तेस्रो खेलमा पनि बंगलादेशमाथि १२२ रनको जित हात पार्‍यो । आर. प्रेमादासा मैदान कोलम्बोमा भएको खेलमा श्रीलंकाले टस जितेर पहिले ब्याटिङ गरेको थियो। 

५० ओभरमा ८ विकेट गुमाएर २९४ रनको स्कोर बनाउने क्रममा श्रीलंकाका लागि एन्जेलो म्याथुजले सर्वाधिक ८७ रन बनाए । कुशल मेन्डिसले ५४, कप्तान करुणारत्नेले ४६ रनको योगदान गरे । कुशल परेराले ४२ र दसुन शनकाले ३० रन जोडेका थिए । बंगलादेशका लागि साफिउल इस्लाम र सौम्य सरकारले ३–३ विकेट लिए। 

२९५ रनको लक्ष्य पछ्याएको बंगलादेशी टोली ३६ ओभरमा १७२ रन बनाउँदा अल आउट भयो । बंगलादेबका लागि सौम्य सरकारले ६९ रन ताइजुल इस्लामले ३९ रन बनाउनुबाहेक अन्यले गतिलो योगदान गर्न सकेनन् । श्रीलंकाका दसुन शनकाले बंगादेशको ३ विकेट लिए । त्यसैगरी कासुन राजिथा र लाहिरु कुमाराले २–२ विकेट लियो। 

यसै एक दिवसीय श्रृखलाको पहिलो खेल खेलेर श्रीलंकाका चर्चित फास्ट बलर लासिथ मालिंगाले एक दिवसीय क्रिकेटबाट सन्यासको घोषणा गरे । आफ्ना एक उत्कृष्ट खेलाडीको बिदाई गरेको श्रृंखलाको अन्त्य भने श्रीलंकाली क्रिकेट टोलीले सुखद बनायो । मालिंगाको अनुपस्थितमा पनि पछिल्ला दुई खेलमा श्रीलंकाका युवा बलरहरुले उत्कृष्ट बलिङ गरे। 

बंगलादेशको विकेट लिए पछि खुसी मनाउँदै श्रीलंकाका खेलाडी । तस्बिर : श्रीलंका क्रिकेट बोर्ड

लामो समयसम्म कुनै पनि फर्म्याटका क्रिकेटमा राम्रो प्रदर्शन गर्न नसकेको श्रीलंकाली टोलीले विश्वकप लगतै भएको सिरिजमा जित हात पार्दै लयमा देखिएको छ । गत महिना मात्रै सकिएको विश्वकपमा पनि श्रीलंकाको प्रदर्शन औसत थियो । कुमार सांगाकार तिलकरत्ने दिलसान जस्ता पुराना खेलाडी बाहिरिएपछि श्रीलंकन क्रिकेट टोलीको प्रदर्शन खस्किएको थियो । श्रीलंकन टोली हाल अधिकांश युवा खेलाडी छन्।