चरिकोट : उत्तरी दोलखाको गौरीशंकर गाउँपालिका–१, जूँगुमा पहिरोमा पुरिएर २ जना वेपत्ता भएका छन् । गएराति आएको पहिरोमा पुरिएर गौरीशंकर गाउँपालिका–१, जूँगुका करिब ५५ वर्षीय जीतबहादुर खत्री र वडा नं. २ का करिब १९ वर्षीय निशान खड्का वेपत्ता भएको दोलखा प्रहरीले जनाएको छ ।
गएराति सिताको थान–जूँगु सडकखण्डमा एक सवारी साधन पहिरो पुरिएको थियो । सोही सवारी निकाल्ने क्रममा थप पहिरो आई पुरिएर दुईजना बेपत्ता भएको स्थानीयलाई उद्धृत गर्दै दोलखाका प्रहरी प्रवक्ता प्रहरी निरीक्षक रेशम बोहराले जानकारी दिए ।
पहिरोको कारण निजी सवारी साधनमा यात्रा गरिरहेका अन्य ५ जना घाइते भएका छन् । उनीहरुको स्थानीय स्वास्थ्य चौकीमा उपचार भइरहेको प्रहरीले जनाएको छ ।
जिरी र मैनापोखरीको प्रहरी टोली घटनास्थलतर्फ लागेको भएपनि जूँगु खोला बढेर पुग्न ढिलाई भएको र थप विवरण आउँन बाँकी रहेको जिल्ला प्रहरी कार्यालयले जनाएको छ ।
प्रतिक्रिया दिनुहोस !
