मदन भण्डारी लोकमार्गको निर्माण नसकिँदै कालोपत्रे उप्कियो
साउन १८, २०७६ शनिबार १३:८:०
सिन्धुली : मदन भण्डारी लोकमार्ग पश्चिम खण्डको निर्माण कार्य नसकिँदै कालोपत्रे उप्किन थालेको छ । वर्षाको समयमा सडक निर्माण गरिएको कारण सडकको सिन्धुली–हेटौंडा खण्डमा क्षति पुगेको हो ।
असारको अन्तिम साता आएको वर्षातले लोकगर्माको रिटेरिङ वाल, नाला, ग्याभिन तथा कालोपत्रेमै क्षति पुर्याएको स्थानीयले बताएका छन् ।
सडकको बिचभागमै कालोपत्रे सबै उप्किएर सडक बिग्रिएको छ । अधिकांश कालोपत्रे पानीले बगाएको छ । पानीले सडकमा क्षति पुर्याउँदा अहिले गाडी संचालनमै समस्या भएको हरिहरपुरगढीका स्थानीयबासी रुद्रमान मोक्तान बताउँछन् । ‘ठाउँठाउँमा भर्खरै बनाएको कालोपत्रे नै उप्किएर बगेको छ । अधिकांश ठाउँका नाला र वाल भत्किएका छन्,’उनले अन्नपूर्णलाई भने ।
हरिहरपुरगढी गाउँपालिकाका अध्यक्ष कारसाङ लामा पनि सडकमा धेरै क्षति भएको बताउँछन् । उनले भने, ‘वर्षातको पानीले वाल र नालासंगै कालोपत्रे पनि भत्किएर खाल्टैखाल्टा पारेको छ।’
मदन भण्डारी लोकमार्गको सिन्धुली–हेटौँडाको पश्चिम खण्ड निर्माणको जिम्मा कालिका कन्स्ट्रक्सनले लिएको छ । सिन्धुली सदरमुकाम सिन्धुलीमाढीबाट हेटौंडासम्मको १ सय १५ किलोमिटर सडक निर्माण गर्दै आएको कन्स्ट्रक्सनले सिन्धुली जिल्लातर्फ १७ किलो मिटर र हेटौंडातर्फ १७ किलोमिटर कालोपत्रेसमेत गरिसकेको थियो ।
एक साताको वर्षातले नै सडकमा क्षति पुगेपछि स्थानीयले भने निर्माण कम्पनीको लापरबाही भएको आरोप लगाएका छन् ।
‘आकासको पानीले नै बगाउने कालोपत्रे गुणस्तरहीन छ कि भन्ने शंका पैदा भएको छ । यस विषयमा आयोजनाले ध्यान दिनुपर्ने हुन्छ,’ हरिहरपुरगढीका एक स्थानीयले बताए ।
तर, निर्माण कम्पनीका प्रोजेक्ट म्यानेजर उज्ज्वल प्रसाईं भने काम गुणस्तरहीन भएको स्विकार्दैनन् । ‘लगातारको वर्षाका कारण सडकको कालोपत्रेदेखि वाल, नाला, ग्याभिन लगायत अन्य फाउण्डेशनका सबै काममा क्षति पुगेको छ । वर्षातले करोडौंको क्षति भए पनि काम गुणस्तरहीन भएको हैन।'
सडकको पश्चिम खण्डमा पुल, कजवे, ह्युमपाइप, बक्स कल्भर्ट र स्ल्याब कल्भर्ट लगाएतको संरचना निर्माणको काम धमाधम भइरहेको छ । १ सय १५ किलोमिटर सडक आयोजनामा ३३ पुल, ५७ कजवे, ३ सय ९७ ह्युमपाइप, १९ बक्स कल्भर्ट, ४ स्ल्याब कल्भर्ट निर्माण गरिने छ ।
निर्माण कम्पनीले तीनवर्षभित्र निर्माण सम्पन्न गर्ने गरी ९ सय करोड रुपैयाँमा २०७३ कात्तिक २२ गते ठेक्का सम्झौता लिएको थियो ।
प्रतिक्रिया दिनुहोस !
