काठमाडौं : बीपी कोइराला स्वास्थ्य विज्ञान प्रतिष्ठान धरान उपकुलपति प्रा डा राजकुमार रौनियार विरुद्ध विशेष अदालतमा मुद्दा दायर गरिएको छ ।
सेवाग्राहीसँग घुस लिँदालिँदै अख्तियार दुरुपयोग अनुसन्धान आयोगले पक्राउ गरेका रौनियारलाई १ करोड २८ लाख विगो दाबी गरिएको छ । उनले होस्टेल तथा फार्मेसी भवन निर्माणको ठेक्का लिने श्याम सुन्दर निर्माण सेवा प्रालिको सब कन्ट्रयाक्टर गिना कन्स्ट्रक्सन कम्पनी प्रालीका प्रबन्ध निर्देशक सुशिलकुमार झाससँग घुस लिएका थिए ।
उनले भवन निर्माण मोविलाइजेसन रकम भुक्तानी दिँदा विभिन्न विल भुक्तानी गर्दा घुस लिएको अख्तिायरको दाबी छ । उपकुलपति रौनियार र उनका भतिजा डा. रामहरी रौनियारले असार १६ गते निवासमा नै बोलाएर झासँग घुस लिँदालिँदै अख्तियारले पक्राउ गरेको थियो ।
उपकुलपतिका भतिजा डा रामहरीलाई प्रतिवादी बनाइएको अख्तियार प्रवक्ता प्रदीपकुमार कोइरालाले जानकारी दिए । साक्षीका रुपमा प्रस्तुत भउका ठेकेदार झा र सवारी चालक दिवाकार कार्कीलाई भने सजाय छुट लिइएको छ ।
प्रतिक्रिया दिनुहोस !
