फुटबलर स्नाइडरले खेल जीवनबाट लिए सन्न्यास
आम्सटर्डम : नेदरल्यान्डका चर्चित फुटबलर वेस्ली स्नाइडरले सक्रिय खेल जीवनबाट सन्न्यास लिएका छन् ।
आफ्नो समयका चर्चित खेलाडी स्नाइडर पछिल्लो समय कतारको क्लब अल घाराफाबाट व्यावसायिक फुटबल खेल्थे । ३५ वर्षीय स्नाइडरले १७ वर्ष लामो खेलजीवनका क्रममा राष्ट्रिय टोलीसँगै थुप्रै चर्चित क्लबबाट व्यावसायिक फुटबल खेलेका थिए ।
आक्रामक मिडफिल्डर स्नाइडरले डच क्लब आयाक्सबाट व्यावसायिक खेलजीवन सुरु गरेका थिए । सन् २००२ देखि सन् २००७ सम्म आयाक्समा बिताएपछि उनी स्पेनिस क्लब रियल म्याड्रिडमा आबद्ध भएका थिए ।
त्यति बेला रियल म्याड्रिडले उनका लागि दुई करोड ३० लाख पाउन्ड खर्चिएको थियो । दुई वर्ष रियल म्याड्रिडमा रहँदा उनले क्लबका लागि ५२ खेल खेल्दै ११ गोल गरेका थिए ।
त्यसपछि सन् २००९ मा उनी इटालियन सिरिए क्लब इन्टर मिलानमा आबद्ध भएका थिए । उमेर समूहको प्रतियोगिता हुँदै सन् २००३ मा डच राष्ट्रिय टोलीमा ‘डेब्यु’ गरेका स्नाइडरले देशका लागि कीर्तिमानी रूपमा एक सय ३४ खेल खेलेका थिए । उनले नेदरल्यान्ड्सका लागि सन् २०१० को विश्वकप पनि खेलेका थिए । उक्त विश्वकपको फाइनलमा नेदरल्यान्ड्सलाई स्पेनले हराएको थियो ।
खेलाडीका रूपमा सन्न्यास लिएपछि उनी अब प्रशिक्षकको भूमिकामा देखिने तयारीमा छन् । ‘अन्ततः मैले खेलाडीको भूमिकाबाट सन्न्यास लिने निर्णय गरेको छु । फुटबल मैदानमा बिताएका तीतामीठा क्षणहरू सधैं मेरो स्मरणमा जीवित रहनेछ’, सन्न्यास घोषणा गर्दै स्नाइडरले भनेका छन्, ‘आगामी दिनमा पनि म फुटबलबाट भने टाढा रहने छैन ।’ स्नाइडरले टर्कीको गालातसारे र फ्रान्सको नाइसबाट पनि व्यवसायिक फुटबल खेलेका थिए ।