चीनमा एक लाख हतियार नष्टदेखि उत्तर काेरियाकाे साइबर आक्रमणमा यूएनकाे अनुसन्धानसम्म

बेलायतले इरानी ट्यांकर छिट्टै रिहा गर्नसक्ने

तेहरान : बेलायतले कब्जा गरिराखेका इरानी तेल ट्यांकरहरु रिहा हुनसक्ने बताइएको छ । केही कागजी प्रक्रिया पूरा भएपछि बेलायतले ती ट्यांकर छिट्टै रिहा गर्नसक्ने इरानले जनाएको हो । बेलायतले इरानी सामान बोकेका ट्यांकर कब्जामा लिँदैआएको थियो । इरानी अधिकारीहरुले अन्तर्राष्ट्रिय मिडियासँग मंगलबार यसबारे जानकारी दिएका हुन् ।

भारतको केरलामा मृत्यु हुनेको संख्या ८८

नयाँदिल्ली : भारतको केरलामा बाढीका कारण मृत्यु हुनेको संख्या मंगलबार ८८ पुगेको छ । अन्य राज्यमा मौसम खुले पनि केरलामा बाढीको असर अझै छ । बाढीले भारतका विभिन्न स्थानमा गरी २ सय १० जनाको मृत्यु भइसकेको छ । यसमध्ये केरलामा ८८, महाराष्ट्रमा ४२, कर्नाटका र गुजरातमा ३१ जनाको मृत्यु भइसकेको छ । अगस्ट ८ देखि आएको बाढीमा ४० जना अझै बेपत्ता छन् । केरलालाई भने सरकारले जोखिमयुक्त क्षेत्र घोषणा गरेको छ ।

औषधि किन्न श्रीमानसँग ३० रुपैयाँ माग्दा ‘ट्रिपल तलाक’

नयाँदिल्ली : भारतको उत्तर प्रदेशको हपुर जिल्लास्थित एक मुस्लिम महिलाले आफ्ना पतिसँग औषधिको लागि ३० रुपैयाँ माग्दा पतिबाट ‘ट्रिपल तलाक’ पाएको बताएकी छन् । ती महिलाकी आमाले छोरी बिरामी हुँदा श्रीमानसँग औषधिको लागि खर्च माग्दा विवाद भएपछि ट्रिपल तलाक पाएको बताएकी थिइन् । घरबाटै निकालिएको पनि पीडित महिलाको गुनासो छ । उनले दुई सन्तानलाई पनि आफूसँगै लिएर घरबाट निस्किएको दावी गरेकी छन् ।

विश्वचर्चित गायकमाथि यौन शोषणको आरोप

स्पेन : स्पेनका चर्चित ओपेरा गायक प्लासिडो डोमिंगोलाई नौ महिलाले एकैचोटी यौन शोषणको आरोप लगाएका छन् । आरोप लगाउनेमध्ये आठजना गायिका नै हुन् भने एक ‘डान्सर’ हुन् । ७८ वर्षीय गायक प्लासिडोले आफ्नो ३० वर्षे करिअरको अवधिमा यौन शोषण गरेको कुरा एपीले जनाएको छ । डोमिंगो अहिलेसम्मकै सर्वोत्कृष्ट ओपेरा गायकमध्ये एक मानिन्छन् । ती महिलाका अनुसार डोमिंगोको गलत गतिविधिका कारण उनीहरुको करिअरमै नोक्सान परेको थियो ।

उत्तर कोरियाको साइबर आक्रमणबारे यूएनको अनुसन्धान

वासिङ्टन : उत्तर कोरियाले गरेको भनिएको साइबर आक्रमणबारे संयुक्त राष्ट्रसंघले अनुसन्धान गरिरहेको छ । राष्ट्रसंघीय विज्ञका अनुसार उत्तर कोरियाले १७ देशमा ३५ वटा साइबर आक्रमण गरेको हो । हतियारका लागि अवैध रुपमा रकम संकलन गर्न उसले यस्ता आक्रमण गरेको उनीहरुको भनाइ छ ।

बंगलादेशमा डेंगुका कारण ४० को मृत्यु

ढाका : बंगलादेशमा डेंगुका कारण ४० जनाको मृत्यु भइसकेको छ । मंगलबार सरकारले यस्तो तथ्यांक सार्वजनिक गरेको हो । पछिल्लो समय देशभर हजारौंको संख्यामा डेंगुका बिरामी भएको बताइएको छ । यस्ता बिरामीहरुले गर्दा अस्पताल समेत खचाखच हुँदैआएका छन् । गत जनवरीदेखि ४४ हजार बिरामी अस्पताल भर्ना भइसकेका छन् ।

चीनमा एक लाख अवैध हतियार र विस्फोटक पदार्थ नष्ट

बेइजिङ : चिनियाँ प्रहरीले एक लाख ७ हजार अवैध हतियार र ठूलो संख्यामा विस्फोटक पदार्थ नष्ट गरेको छ । देशभरका एक सय ५४ सहरमा अवैध रुपमा राखिएका हतियार र विस्फोटक पदार्थ नष्ट गरिएको बताइएको छ । प्रहरीले गत वर्षदेखि नै यस्ता हतियार र पदार्थ नष्ट गर्दैआएको हो ।