मोटरसाइकल र स्कुटर ठोक्किए : एकको मृत्यु, एक घाइते
भक्तपुर : भक्तपुर- काठमाडौं ६ लेन सडकको मध्यपुर थिमि नगरपालिका ४ चारदोबाटो खण्डमा मोटरसाइकल र स्कुटर एकापसमा ठोकिँदा शुक्रबार एकको मृत्यु भएको छ। महानगरीय प्रहरी परिसर भक्तपुरका अनुसार नयाँ ठिमीबाट काठमाडौं जाँदै गरेको बा ७३ प ९७२१ नम्बरको मोटरसाइकल र नेपाल कोरिया मैत्री अस्पतालबाट ६ लेन सडक क्रस गरी बालकोटतर्फ जाँदै गरेको बा ६७ प ६७५४ नम्बरको स्कुटी ठोक्किएका थिए।
ठक्करबाट घाइते मोटरसाइकल चालक मध्यपुर थिमि नपा ५ कमेरेटार बस्ने २२ वर्षीय राजेश गोजाको उपचारको क्रममा मृत्यु भएको परिसरका प्रवक्ता प्रहरी नायब उपरीक्षक रेवतीरमण पोखरेलले जानकारी दिए। उनका अनुसार स्कुटरका चालक भक्तपुर नपा ५ टौमढी बस्ने ३१ वर्षीय प्रवीण लोहला घाइते भएका छन्।
दुर्घटनालगत्तै घाइते दुवैलाई तत्काल उपचारको लागि गट्ठाघरस्थित मध्यपुर अस्पतालमा लगिएको उनले बताए। घाइते लोहलाको थप उपचार मध्यपुर अस्पतालमै भइरहेको उनले बताए । भक्तपुर प्रहरीका अनुसार दुवै सवारीसाधन महानगरीय प्रहरी वृत्त ठिमीको नियन्त्रणमा रहेको छ।घटनाबारे थप अनुसन्धान भइरहेको प्रहरीले जनाएको छ।