हेटौंडा : दुई महिनापछि आइतबार प्रदेश ३ को प्रदेशसभा बैठक बसेको छ। बैठकमा २ वटा नयाँ विधेयक पेश भएका छन्। ‘प्रदेश लोकसेवा आयोगको गठन, काम, कर्तव्य, अधिकार र कार्यविधिका सम्बन्धमा व्यवस्था गर्न बनेको विधेयक’ र सार्वजनिक निजी सहकारी सम्बन्धमा व्यवस्था गर्न बनेको विधेयक पेश भएको हो।
प्रदेश लोकसेवा सम्बन्धी विधेयक मुख्यमन्त्री डोरमणि पौडेल र सार्वजनिक निजी सहकारी सम्बन्धी विधेयक आन्तरिक मामिला तथा कानुनमन्त्री शालिकराम जमकट्टेलले पेश गरेका थिए।
बैठकमा २ वटा विधेयक संशोधनको लागि पेश भएको छ। प्रदेशसभा सचिवालय सम्बन्धमा व्यवस्था गर्न बनेको ऐन २०७४ संशोधन गर्न बनेको विधेयक र सवारी यातायात सम्बन्धमा व्यवस्था गर्न बनेको विधेयक संशोधनको लागि पेश भएको प्रदेशसभा सचिवालयले जनाएको छ।
विषयगत समितिमा छलफल सकिएपछि प्रतिवेदनसहित प्रदेशसभा बैठकमा प्रदेश सूचनाको हक सम्बन्धी विधेयक र मदनकुमार भण्डारी स्वास्थ्य विज्ञान प्रतिष्ठान सम्बन्धी विधेयक पेश भएको छ।
बैठकमा विशेष समय लिएर बोल्दै प्रदेशसभा सदस्य विशाल खड्का, लालकुमारी पुन, निमा लामा, केशवराज पाण्डे र राजकाजी महर्जनले बाढी पहिरोले अ–आफ्नो क्षेत्रमा गरेको क्षति र प्रदेश सरकारको भूमिकाबारे बोलेका थिए। सभामुख सानुकुमार श्रेष्ठले बैठक भोलि बिहान ११ बजेसम्मको लागि स्थगित गरेका छन्।
प्रतिक्रिया दिनुहोस !
