हेटौंडा : सत्तापक्ष नेकपाका प्रदेशसभा सदस्यहरुले ३ नम्बर प्रदेशको स्थायी राजधानी र नाम छिटो टुङ्गो लगाउन सभामुख र सरकारलाई दवाव दिएका छन् । सोमबार बसेको प्रदेशसभा बैठकमा विशेष समयमा बोल्दै उनीहरुले अस्थायी राजधानीका कारण अस्थायी मानसिकताले काम गर्दा जनताले प्रदेश सरकारको अनुभूति गर्न नपाएको बताए ।
नेकपा प्रदेश ३ की इन्चार्जसमेत रहेकी प्रदेशसभा सदस्य अष्टलक्ष्मी शाक्यले तत्काल प्रदेशको स्थायी राजधानी टुङ्गो लगाउनुपर्ने बताइन् । नेकपाका अर्का सांसद लक्ष्मण लम्सालले संविधानले दिएको अधिकार प्रदेशसभा सदस्यहरुले प्रयोग गर्न पाउनुपर्ने माग गरे ।
बैठकमा बोल्दै नेकपाकी प्रदेशसभा सदस्यहरु वेलीमाया घले, रत्न ढकाल, चन्द्रकुमार लामा, नेपाली कांग्रेसकी प्रदेशसभा सदस्य बिजुला वर्मा राणाले तत्काल स्थायी राजधानी टुङ्गो लगाउने प्रक्रिया अघि बढाउन माग गरेका थिए ।
विशेष समयमा बोल्ने प्रदेशसभा सदस्यहरुले पत्रकार शालिकराम पुडासैनी आत्महत्या प्रकरणबारे चासो व्यक्त गरेका थिए । उनीहरुले सम्बन्धित निकायलाई घटनाको निष्पक्ष छानविन गर्न दिनुपर्ने बताए । बैठकमा ४ वटा विधेयकहरु माथि सैद्धान्तिक छलफल भएको थियो । बैठक भोलि मंगलबार बिहान ११ बजेसम्मको लागि सभामुख सानुकुमार श्रेष्ठले स्थगित गरेका छन् ।
प्रतिक्रिया दिनुहोस !
