ललितपुर : ललितपुर महानगरपालिकाका प्रमुख चिरिबाबु महर्जनले कुपन्डोलदेखि चोभारको सुन्दरीघाटसम्म र्याफ्टिङ गरेका छन् । बागमती सफाइ अभियान अन्तर्गत तीन सय २९ औं साता पुगेको अवसरमा अभियन्ताहरुले उक्त कार्यक्रमको आयोजना गरेको हुन्।
र्याफ्टिङ गरेर सुन्दरीघाट पुगेका महर्जनले बागमतीमा पहिलोपटक र्याफ्टिङ गर्दा फरक अनुभव गरेको बताए । ‘अरु ठाउँमा धेरै र्याफ्टिङ गरेको छु तर बागमतीमा फरक अनुभव गरेँ’, उनले भने, ‘निकै रमाइलो भयो, अलि-अलि थकाइ पनि लाग्यो । ’
महर्जनले बाग्मतीलाई सफा बनाएर सधैं यसरी नै र्याफ्टिङ गर्न सकियो भने आन्तरिक र बाह्य पर्यटक भित्र्याउने प्रचुर सम्भावना रहेको बताए । र्याफ्टिङ गर्न अहिले चुनौतीजस्तो देखिए पनि गुरुयोजना बनाएर काम गर्न सके सम्भव भएको उनले बताए । कार्यक्रममा उनले बाल्यकालमा देखेको र अहिलेको बागमतीको धेरै पटक तुलना गरे।
बागमती कुरुप र दुर्गन्धित हुनुमा अव्यवस्थित सहरीकरण नै मुख्य कारक भएको उनको भनाइ छ । बागमती वरिपरिका फोहोर संकलन गर्दै उनले बागमतीको संरक्षणसँग मानिसको जीवन जोडीएको सुनाए।
सफाइ अभियानमा नेपाली सेना, सशस्त्र प्रहरी, जनप्रतिनिधि तथा बागमती सफाइ अभियन्ताहरु पुगेका थिए । सफाइ अभियानमा अधिकार सम्पन्न बागमती समिति, मुक्तिनाथ विकास बैंक, नेपाल सिर्जनशील समाज लगायतका संघसंस्थाले हातेमालो गरेका छन्।
आयोजक किशोरसिंह शाहीले बागमतीमा सधैं जलयात्रा गर्न सकिन्छ भन्ने सन्देश दिन चाहेको बताए । नदी संरक्षण समितिका अध्यक्ष मेघ आलेले र्याफ्टिङ गर्दा अपनाउनुपर्ने सावधानीको बारेमा जानकारी गराए।
प्रतिक्रिया दिनुहोस !
