बारा : नक्कली लाइसेन्स बनाउने गिरोहमा सक्रिय तीनजनालाई जिल्ला प्रहरी कार्यालय बाराले नियन्त्रणमा लिएको छ । यातायात ब्यवस्था कार्यालयबाट स्मार्ट लाइसेन्स बनाइदिने भन्दै सर्वसाधारणलाई ठगि गरेको आरोपमा प्रहरीले उनिहरुलाई पक्राउ गरेको हो ।
पक्राउ पर्नेमा बारा सुवर्ण गाउपालिका ५ का ४५ वर्षीय गगनदेव साह, मकवानपुरको बकैया गाउँपालिका ८ का ३९ वर्षीय रामबहादुर स्याङतान र ३३ वर्षीय गोपालसिंह भुलन रहेका छन् । प्रहरीले स्याङतान र भुलनलाई कलैया चोकबाट नियन्त्रणमा लिएको हो भने साहलाई घरबाट नियन्त्रणमा लिएको हो ।
प्रहरीले उनीहरुको साथबाट आठ लाख नगद र पाँच नक्कली लाइसेन्स बरामद गरेको छ । सर्वसाधारणको उजुरीको आधारमा उनीहरुको खोजी भइरहेको थियो । कलैया बजारमा हिँडिरहेको सूचना पाएपछि नियन्त्रणमा लिइएको बाराका प्रहरी प्रवक्ता रञ्जितसिंह राठौरले जानकारी दिए । राठौरका अनुसार उनीहरुले प्रति व्यक्ति २५ हजार रकम लिएर नक्कली लाइसेन्स दिने गरेका थिए । पक्राउपछि २४ सर्वसाधारणलाई ठगी गरेको बयानका क्रममा खुलेको राठौरले बताए ।
पक्राउ परेका तीनमध्येका साह नक्कली लाइसेन्स बनाउन सरकारी छाप दस्तखत किर्ते गरेको मुद्धामा जिल्ला अदालत बाराबाट सजाय पाएका व्यक्ति हुन् । अदालतले कैद सजाए सुनाए पनि साह फरार थिए । जिल्ला अदालतले गत चैत्र १२ गते साहलाई एक वर्ष कैद र ५० रुपैयाँ जरिवाना गरेको थियो ।
मुद्धा फैसला हुनुअघि धरौटी राखेर तारेखमा रिहा फरार भएका उनि अदालत र प्रशासनलाई छक्याउदै पुनः नक्कली लाइसेन्स बनाउन सक्रिय रहेको खुलेको छ । प्रहरीका अनुसार साहले स्याङतानलाई बिचौलीयाको रुपमा प्रयोग गर्दै आएका थिए । प्रकाउ परेकामाथि अदालतबाट म्याद थप भइ अनुसन्धान भइरहेको र अन्यको पनि संलग्नता हुनसक्ने देखिएको प्रहरी प्रवक्ता राठौरले जानकारी दिए ।
प्रतिक्रिया दिनुहोस !
