काठमाडौं : अख्तियार दुरुपयोग अनुसन्धान आयोगले वडाध्यक्षसहित ७ जनाविरुद्ध मुद्दा दायर गरेको छ ।
महोत्तरीको भँगाहा नगरपालिका ८ का वडाध्यक्ष मोहमद रफिक आलमविरुद्ध विषेश अदालतमा मुद्दा दायर भएको अख्तियारका प्रवक्ता प्रदीपकुमार कोइरालाले जानकारी दिए । वडाध्यक्ष आलमले वडा सदस्य कारी साहु तेलीका छोरा मुकेश शाहमार्फत घुस उठाएका थिए ।
सेवाग्राहीसँग एक लाख ६० हजार घुस लिँदालिँदै पक्राउ वडा सदस्य कारी साहुका छोरा मुकेश अख्तियारको फन्दामा परेका थिए । वडाध्यक्षसहित तीनै जनाविरुद्ध जनही १ लाख ६० हजार विगो कायम गर्दै मुद्दा दायर गरिएको छ ।
त्यस्तै अख्तियारले सुलक्षणा माध्यमिक विद्यालय विदुर, नुवाकोटका तत्कालीन प्रधानाध्यापक हरिराम भण्डारीसहित ३ जनाविरुद्ध विशेषमा मुद्दा दर्ता गरेको छ । उनीसँगै विद्यालयका शिक्षक केशवबहादुर बस्नेत र तत्कालिन विद्यालय निरीक्षक कुमारप्रसाद तिमल्सिनाविरुद्ध पनि मुद्दा दायर गरिएको छ ।
भण्डारी विद्यालयको शिक्षक रहेको अवस्थामा ३ वर्षे वेतलबी विदा लिई बैदेशिक रोजगारको लागि मलेसिया गएका थिए । उनले सेवा निवृत हुने समयमा वेतलबी विदा बसेका अवधिको गणना गरी सेवा सुविधा लिएका थिए । भण्डारीलाई सेवा सुविधा उपलब्ध गराउने निवृतिभरण प्रयोजनका लागि विद्यालयका निमित्त प्रअसमेत भएका बस्नेतले तयार गरी विद्यालय निरीक्षक तिमल्सिनाले तत्कालिन जिल्ला शिक्षा कार्यालयमा सिफारिस गरिदिएका थिए ।
यही सिफासिरसका आधारमा भण्डारीले शिक्षक कितावखानाबाट सेवानिवृत सेवासुविधा लिएको पुष्टि भएको छ । तत्कालिन प्रधानाध्यापक भण्डारीसहित तीन जनाविरुद्ध अख्तियारले अनुसन्धान गरी मुद्दा दायर गरेको छ ।
त्यस्तै जुवा अड्डा चलाउने सुयूविनायक नगरपालिका वडा नं.५ सल्लाघारीका गंगालाल श्रेष्ठविरुद्ध पनि अख्तियारले मुद्दा हालेको छ । जुवा अड्डा चलाउन सहज वातावरण बनाइदिने प्रयोजनका लागि प्रहरीलाई ४० हजार घुस दिदाँ दिदै उनी प्रक्राउ परेका थिए । उनीहरुविरुद्ध भ्रष्टाचार निवारण ऐन बमोजिम जरिवाना तथा कैद सजायको मागदाबीसहित विशेषमा आरोप पत्र दायर गरिएको छ ।
प्रतिक्रिया दिनुहोस !
