विश्वभर आज : पाकिस्तानले यूएनमा उठायो 'कश्मीर', उत्तर कोरियामा अब के होला !
काठमाडौँ : केही मानवीय घटना र प्राकृतिक विपद्बाट आज पनि संसारकै ध्यान खिच्ने खालका केही घटना भए । इराकमा मुस्लिम समुदायले मनाउने एक पवृमा भेला भएकाहरुबीच भागदौड हुँदा ठूलो दुर्घटना भयो । हालैको उक्त घटनामा एक सयभन्दा धेरै घाइते भए । हङकङको जारी आन्दोलनमा स्कुले विद्दार्थीले उत्साहजनक सहभागिता जनाए । यस्तै केही महत्वपूर्ण खबर यहाँ प्रस्तुत गरिएको छ ।
उत्तर कोरियाको फेरि क्षेप्यास्त्र प्रक्षेपण
सोल : उत्तर कोरियाले फेरि कम्तिमा दुईवटा क्षेप्यास्त्र प्रक्षेपण गरेको छ । उसले प्रक्षेपण गरेको क्षेप्यास्त्रको प्रकृति भने खुल्न सकेको छैन । उत्तरले अमेरिकालाई वार्ताको लागि आह्वान गरेको केही घण्टामै यही मंगलबार यस्तो प्रक्षेपण गरेको दक्षिण कोरियाली सेनाले बताएको हो ।
उत्तरले आफ्नो राजधानी प्योङयाङ नजिकै दक्षिणी प्रान्तबाट प्रक्षेपण गरेको थियो । उत्तरले गरेको क्षेप्यास्त्रको प्रकृति नखुले पनि समुद्रमा पुग्नुअघि ३३० किलोमिटर माथि उडेको बताइन्छ । अमेरिकाले भने यसबारे कुनै प्रतिक्रिया दिएको छैन ।
बुर्किना फासोमा ६ प्रहरी मारिए
बुर्किना फासो : उत्तरी बुर्किना फासोमा भएको हमलामा ६ जना प्रहरी मारिएका छन् । सोमबार सौम प्रान्तस्थित अधिकृतहरुको समूहलाई लक्षित गर्दै हतियारधारी समूहले एम्बुस थापेको सुरक्षाकर्मीले जनाएका छन् ।
२९ जनाको ज्यान जाने गरी भएको हमलालगत्तै बुर्किना फासोमा अर्को घटना भएको हो । विपन्न मुलुक बुर्किना फासोमा पछिल्लो समय हिंसाका घट्ना बढ्न थालेका छन् । २०१५ देखि अहिलेसम्म ५ सयभन्दा धेरैको ज्यान गइसकेको बताइन्छ । छिमेकी मुलुक मालीबाट यहाँ हतियारधारी विद्रोही समूह छिरेको स्थानीय मिडियाले जनाएका छन् ।
प्रेस नियन्त्रण गर्ने १० मुख्य देशको सूची सार्वजनिक
वासिङटन : प्रेस नियन्त्रण गर्ने संसारका मुलुकहरुको पहिलो सूचीमा एरिट्रिया परेको छ । पत्रकारहरुलाई संरक्षण गर्ने अमेरिकी संस्था (सिपिजे)ले मंगलबार सार्वजनिक गरेको रिपोर्टमा यस्तो उल्लेख छ ।
प्रेस स्वतन्त्रता नियन्त्रण गर्ने १० मुख्य देशको सूची सार्वजनिक भएको हो । जहाँ चीन, उत्तर कोरिया र साउदी अरेबिया पनि छन् । प्रेस नियन्त्रणमा अति खराब तीन मुलुकमा एरिट्रिया, उत्तर कोरिया र तुर्केमिन्स्तान छन् ।
साउदी अरेबिया, चीन, भियतनाम, र इरान क्रमशः चौथोदेखि सातौं सूचीमा छन् । पत्रकारमाथि गरिने व्यवहार जस्तै, पक्राउ, धम्की, अवहेलना जस्ता व्यवहारलाई अनुसन्धानको सूचक बनाइएको थियो ।
गिनी, बेलारुस र क्युबा पनि खराब १० सूचीमा छन् । सिपिजेका अनुसार सिरिया, यमन जस्ता युद्ध प्रभावित मुलुकमा पत्रकारिता गर्न जोखिम भए पनि सरकारी तवरबाट खासै नियन्त्रित छैन । सिरिया, यमन जस्ता मुलुकलाई प्रेस नियन्त्रक खराब १० देशको सूचीमा राख्नु आवस्यक नभएको बताइएको छ ।
बेलायतमा आज पनि पाइलटको हड्ताल
लण्डन : बेलायतमा ब्रिटिश एयरवेजका पाइलटहरुको हड्ताल मंगलबार दोस्रो दिन पनि जारी छ । ब्रिटिश एयरवेजले दोस्रो दिन पनि आफ्ना लगभग सबै उडान स्थगित गरेको छ ।
पाइलटहरुले सोमबार नै तलब र भत्ताको माग गर्दै दुईदिने हड्ताल आह्वान गरेका थिए । यससँगै १ लाखभन्दा धेरै यात्रुको उडान योजनामा असर परेको बताइएको छ । ब्रिटिश एयरवेजले दैनिक आफ्ना सबै ८५० वटै उडान नै स्थगित गरेको हो ।
कश्मीरमा अन्तर्राष्ट्रिय छानविन गर्नुपर्छ : पाकिस्तानी विदेशमन्त्री
इस्लामाबाद : पाकिस्तानी विदेशमन्त्रीले भारतको कश्मीरमा अन्तर्राष्ट्रिय छानविनको लागि संयुक्त राष्ट्रसंघलाई आग्रह गरेका छन् । कश्मीरको मुस्लिम अल्पसंख्यक समुदायमा ‘नरसंहार’को जोखिम रहेको दावी गर्दै विदेमन्त्री साह मेहम्मुद कुरैसीले मंगलबार यस्तो आग्रह गरेका हुन् ।
जेनेभास्थित मानवअधिकार उच्चायोगमा यस्तो बताएका हुन् । ‘नरसंहार शब्द प्रयोग गर्न म डराउँछु, तर पनि भन्नैपर्छ,’ कुरैसीले भने । भारतले आफ्नो संविधान परिवर्तन गर्दै कश्मीरको विशेषाधिकार कटौती गरेपछि पाकिस्तानले विरोध जनाउँदैआएको छ । विदेशमन्त्री कुरैसीले भारत सरकारले ६ हजारलाई पक्राउ गरेको पनि आरोप लगाए ।
मस्जिदमा भागदौड हुँदा ३० भन्दा धेरैको ज्यान गयो, एक सय बढी घाइते
बगदाद : इराकको करबालास्थित एक मस्जिदमा भागदौड हुँदा कम्तिमा ३० जनाभन्दा धेरैको मृत्यु भएको छ । असौरा पर्व मनाउने क्रममा मंगलबार भेला भएको भीडबीच भागदौड हुँदा दुर्घटना भएको हो ।
घटनामा एक सयभन्दा धेरै तिर्थालु घाइते भएका छन् । अधिकांशको अवस्था चिन्ताजनक रहेको बताइएको छ । घटनास्थल राजधानी बगदादको १ सय किलोमिटर पश्चिमतर्फ पर्छ । स्वास्थ्य मन्त्रालयका प्रवक्ता सेफ अल बद्रका अनुसार घाइतेको संख्या अझै यकिन हुन बाँकी छ ।
हङकङमा स्कुले विद्यार्थीहरुले बनाए मानव साङ्लो
हङकङ : हङकङका माध्यमिक तहका स्कुले विद्यार्थीहरुले यहाँ जारी प्रदर्शनमा समर्थन जनाउँदै मानव साङ्लो बनाएका छन् । मंगलबार हजारौँको संख्यामा भेला भएका स्कुले विद्यार्थीहरुले मानव साङ्लो बनाएर र्याली निकालेका थिए ।
उनीहरुले ‘प्रो डेमोक्रेसी’ प्रदर्शनकारीको समर्थनमा नारा लगाउँदै प्रदर्शन गरे । गृहकार्यका लागि कठिन मेहनेत गर्ने बालबालिकाको रुपमा चिनिने हङकङका स्कुले विद्यार्थीको यो आन्दोलनलाई प्रभावशाली ठानिएको छ ।
पछिल्लो १४ सातादेखि जारी हङकङको प्रदर्शनमा लाखौँ मानिस सहभागी भइसकेका छन् । विश्वकै ध्यान तानेको यो आन्दोलनमाथि चीनले पटक पटक धम्की दिँदैआएको छ ।
बहमासमा डोरियनले तहसनहस
नसाउ : बहमास द्वीपलाई केन्द्रविन्दु पारेर आएको शक्तिशाली डोरियन आँधीले बहमासलाई तहसनहस पारेको छ । स्थानीय बासिन्दा भग्नावशेषका बीचमा जनजीवनलाई सामान्य तुल्याउन संघर्षरत छन् ।
समुद्रको छाल र भीषण वर्षासहित आएको डोरियन आँधीले अस्तव्यस्त तुल्याएको यहाँको जनजीवन अझै पनि असामान्य छ । बहमासका प्रधानमन्त्री हुबर्ट मिन्निसले गत सोमबार बहमास द्वीपका जनताका लागि यो आँधी ‘इतिहासकै दुःखान्त’ भएको बताएका थिए ।
बहमासका स्वास्थ्यमन्त्री ड्वाने सनड्सले डोरियन आँधीबाट ४४ जनाको मृत्यु भएको पुष्टि गरेका छन् । यसअघि यस आँधीको प्रकोपबाट ३० जनाको मृत्यु भएको अमेरिकी टेलिभिजन सीएनएनले जनाएको थियो । यस आँधीबाट लाखौँ मानिस प्रभावित भएका छन् ।