विश्वभर आज : तालिबानको अर्को हमला, कंगो दुर्घटनामा ५० बढीको मृत्यु
काठमाडौँ : आज पनि केही घटनाले विश्वभर तरंग ल्याए । कंगोमा भएको रेल दुर्घटना, चीन र भारतको विवादित क्षेत्र लद्दाखमा दुई देशका सेनाबीच भएको घम्साघम्सी, तालिबानी समूहको अर्को विस्फोट । यस्ता केही घटना वरिपरी केन्द्रित छ विश्व खबर :
उत्तर कोरियाको मुद्दा सल्टाउन अमेरिकालाई चीनको आग्रह
बेइजिङ : चिनियाँ विदेशमन्त्री वाङ यीले अमेरिकालाई उत्तर कोरियाको परमाणु मुद्दालाई सल्टाउन आग्रह गरेका छन् । ‘चरम विवाद’ ले कहिल्यै काम नगर्ने भन्दै उक्त मुद्दा सल्टाउन प्रयास गर्नका लागि अमेरिकालाई आग्रह गरेका हुन् । साथै उनले संयुक्त राष्ट्रसंघीय सुरक्षा परिषद्ले उत्तरमाथिको प्रतिबन्ध फुकुवा गर्नेबारे बहस गर्नुपर्ने पनि दोहोर्याए।
लद्दाखमा भारतीय र चिनियाँ सेनाबीच भिडन्त
नयाँदिल्ली : भारतीय सेना र चिनियाँ सेनाबीच दोहोरो भिडन्त भएको छ । विवादित क्षेत्र लद्दाखमा चिनियाँ सेनासँग बुधबार भारतीय सेनाको भिडन्त भएको हो । भारतीय मिडियाका अनुसार यस क्षेत्रमा मानवीय क्षति भने भएको छैन ।
लद्दाखस्थित भारतीय सैनिकहरु गस्ती गरिरहँदा चिनियाँ सेनाले अवरोध गरेपछि विवाद उत्पन्न भएको थियो । कश्मीरसँग जोडिएको लद्दाख क्षेत्रको विषयलाई लिएर चीन र भारतबीच बेला बेला विवाद हुँदैआएको छ । यसअघि भुटानसँग जोडिएको सीमाक्षेत्र दोक्लममा पनि चिनियाँ सेनासँग भारतीय सेनाको भिडन्त भएको थियो ।
‘सेक्सिस्ट’ व्यवहार देखाएको भन्दै हाकिमविरुद्ध महिला प्रहरीले दिइन् उजुरी
लण्डन : ४३ वर्षीया एक महिला प्रहरी अधिकृतले आफ्नै हाकिमले यौनवादी व्यवहार देखाएको भन्दै मुद्दा दायर गरेकी छन् । यौनवादलाई संस्थागत गरेको भन्दै स्कटल्याण्डमा रोह्ना मालोन नामकी प्रहरी अधिकृतले आफ्नै हाकिमविरुद्ध मुद्दा दायर गरेकी हुन् ।
उनकै एक हाकिमले महिला अधिकृत पुरुषविना ड्यूटीमा जान नहुने आदेश दिएको भन्दै उनले उजुरी दिएकी हुन् । अधिकृत केथ वारअस्र्टविरुद्ध उनले उजुरी दिएकी हुन् । वारअस्र्टले इमेल मार्फत पनि ‘सेक्सिस्ट’ व्यवहार देखाएको आरोप उनको छ । रोह्नाकै केही सहकर्मीले भने उनको उजुरीलाई अस्वभाविक भन्दै टिप्पणी गरेका छन् ।
ट्रम्पले आफ्नै सल्लाहकार हटाउनुको कारण ‘इरान समर्थक’
वासिङ्टन : अमेरिकी राष्ट्रपति डोनल्ड ट्रम्पका राष्ट्रिय सुरक्षा सल्लाहकार जोन बोल्टनले ट्रम्पको इरान नीतिमा असन्तुष्टि व्यक्त गरेकाले उनलाई हटाइएको खुलासा भएको छ ।
इरानमाथि अमेरिकाले लगाएको प्रतिबन्धविरुद्ध उनले कडा असन्तुष्टि व्यक्त गर्दैआएको अन्तर्राष्ट्रिय मिडियाले जनाएका छन् । सोहीकारण ट्रम्पले बोल्टनलाई हटाएका थिए ।
ट्रम्पले भने बोल्टनलाई हटाएको कुरा ट्वीटरमार्फ पनि सार्वजनिक गरेका थिए । इरान र उत्तर कोरियासँग बोल्टनको सम्बन्ध रहेको पनि ट्रम्पको भनाइ थियो । निजी सहयोगीलाई हटाएको एक सातामै ट्रम्पले हिजो मात्रै आफ्ना सुरक्षा सल्लाहकार बोल्टनलाई पनि बर्खास्त गरेका हुन् ।
शान्ति सेनामा गएका भारतीय सैनिक अधिकृत वेपत्ता
कंगो : कंगोस्थित संयुक्त राष्ट्रसंघीय शान्ति मिसनका लागि तैनाथ भारतीय एक सैनिक अधिकृत वेपत्ता छन् । भारतीय सेनाका लेफ्टिनेन्ट कर्नेल गौरव सोलन्की ६ दिनदेखि वेपत्ता भएका हुन् ।
गत शनिबार दिउसोदेखि किबु लेकमा कायाकिङ गर्न गएका गौरव त्यहीँबाट सम्पर्क विहीन भएको भारतीय मिडियाले जनाएका छन् । भारतीय सेनाको टोली सहित कंगोमा गौरवको खोजी गरिएको बताइएको छ ।
कंगोमा रेल दुर्घटना, ५० बढीको ज्यान गयो
कंगो : प्रजातान्त्रिक गणतान्त्रिक कंगोमा रेल दुर्घटना हुँदा ५० जनाभन्दा धेरैको मृत्यु भएको छ । दक्षिणपूर्वी क्षेत्रस्थित माइबारिदी सहरमा बिहीबार घातक दुर्घटना भएको यहाँको सरकारले जानकारी दिएको छ ।
घटनामा २३ जना घाइते छन् । अन्तर्राष्ट्रिय मिडियाका अनुसार मृतकको संख्या बढ्नसक्छ । गत मार्चमा मात्रै कंगोमा यस्तै प्रकृतिको दुर्घटनामा २४ जनाको ज्यान गएको थियो । ३१ जना घाइते भएका थिए ।
अमेरिकामा ई–चुरोट प्रतिबन्ध लगाइँदै
वासिङ्टन : अमेरिकामा ‘ई सिगरेट’ अर्थात् सुगन्धित विद्युतीय चुरोट प्रतिबन्ध लगाउने तयारी गरेको छ । डोनल्ड ट्रम्प प्रशासनले यसबारे नीति बनाएर यस्ता चुरोटमा प्रतिबन्ध लगाउन लागेको हो ।
किशोर किशोरीहरुमाझ लोकप्रिय भइरहँदा सरकारले यस्ता पदार्थको उत्पादनमा रोक लगाउन लागेको हो । पछिल्ला केही अध्ययनले किशोर किशोरीहरुमा ई सिगरेटको प्रयोग बढ्दैगरेको छ ।
तर फोक्सोमा असर पुग्ने र गलत संस्कृति बसेको भन्दै सरकारले कडा नीति अवलम्वन गरेको हो । अमेरिकी मिडियाले जनाए अनुसार अबको एक महिनापछि नै अमेरिकामा सुगन्धित ई चुरोट विक्री गर्न पाइनेछैन ।
इरानमा पक्राउ परेका अष्ट्रेलियन जोडीको पहिचान खुल्यो
तेहरान : इरानमा नियन्त्रणमा परेका दुई अष्ट्रेलियल नागरिकको पहिचान खुलेको छ । जोली किङ र मार्क फिर्किनको जोडी पेशागत रुपमा ‘ब्लगर’ भएको पनि खुलेको छ ।
किङको साथमा बेलायती पासपोर्ट भएको बिबिसीले जनाएको छ । यात्राको क्रममा रहेका उनीहरु इरानमा पक्राउ परेका थिए । अन्तर्राष्ट्रिय मिडियाका अनुसार उनीहरु एसिया र मध्यपूर्वी क्षेत्रको यात्रामा थिए । यस क्रममा ब्लग तयार पार्दैआएका थिए । यस्तो घटना बाहिरिएपछि उनीहरुको रिहाइको लागि कुटनीतिक पहल भइरहेको बताइएको छ ।
तालिबानको अर्को विस्फोट, चार सुरक्षाकर्मी मारिए
काबुल : अफगानिस्तानको काबुलस्थित आत्मघाती बम हमला हुँदा कम्तिमा चार सुरक्षाकर्मी मारिएका छन् । अरु तीनजना घाइते भएका छन् । बिहीबार दिउसो चहर अस्याब जिल्लामा यस्तो हमला भएको हो ।
घटनाको जिम्मेवारी तालिबान समूहले लिएको छ । तालिबान प्रवक्ता जबिहुल्लाह मुजाहिदले विज्ञप्ति नै जारी गर्दै घटनाको जिम्मेवारी लिए । अमेरिकी राष्ट्रपति डोनल्ड ट्रम्पले तालिबानीमाथि पहिले भन्दा पनि कडा आक्रमण गर्न निर्देशन दिएलगत्तै तालिबानी समूहले यस्तो हमला गरेको हो । गत साता मात्रै अमेरिका–तालिबान शान्ति वार्ताको तयारी भइरहँदा तालिबानी समूहले लगातार दुई विस्फोट गराएको थियो ।