ओलम्पिक कमिटीको निर्वाचन शनिबार
काठमाडौं : सर्वोच्च अदालतको अन्तरिम आदेशका कारण स्थगित भएको नेपाल ओलम्पिक कमिटी (एनओसी)को निर्वाचनका लागि नयाँ मिति घोषणा गरिएको छ । नयाँ घोषित मितिअनुसार एनओसीको निर्वाचन आगामी शनिबार हुनेछ । निर्वाचन ललितपुरको सातदोबाटोस्थित ओलम्पिक कमिटीको मुख्यालयमा हुनेछ ।
एनओसीका अध्यक्ष जीवनराम श्रेष्ठका अनुसार निर्वाचन अन्तर्राष्ट्रिय ओलम्पिक कमिटी (आईओसी) र ओलम्पिक काउन्सिल अफ एसिया (ओसीए)को पर्यवेक्षणमा हुन लागेको हो । यसअघि गत भदौ २० गते एनओसीको निर्वाचन गर्ने भनी मिति घोषणा गरिएको थियो । तर, राष्ट्रिय मान्यता नपाएको ओलम्पिक कमिटीको निर्वाचन रोक्न माग गर्दै भदौ १७ गते कमलबहादुर चित्रकारले सर्वोच्च अदालतमा रिट दायर गरेका थिए ।
नेपाल टेबुलटेनिस संघका पूर्वमहासचिवसमेत रहेका चित्रकारले सरोकारवाला १२ जना व्यक्ति र संस्थालाई विपक्षी बनाउँदै रिट दायर गरेका थिए । उक्त रिटमाथि सुनुवाइ गर्दै सर्वोच्चका न्यायाधीश टंकबहादुर मोक्तानको एकल इजलासले तत्कालका लागि एनओसीको निर्वाचन रोक्न अन्तरिम आदेश जारी गरेको थियो । सर्वोच्चले भदौ २२ गते दुवै पक्षलाई छलफलका लागि बोलाएको थियो ।
तर, भदौ २२ गते दुवै पक्षको बहस सुनेपछि सर्वोच्चका न्यायाधीश तेजबहादुर केसी र मनोजकुमार शर्माको संयुक्त इजलासले अन्तरिम आदेशलाई निरन्तरता दिनु नपर्ने निर्णय सुनाएको थियो । त्यसपछि एनओसीको निर्वाचन गर्ने बाटो खुलेको हो । एनओसी निर्वाचनका लागि उम्मेदवारी दर्तालगायतका प्रक्रिया यसअघि नै पूरा भइसकेको छ ।
अध्यक्ष पदका लागि वर्तमान अध्यक्ष जीवनराम श्रेष्ठ र पूर्वउपाध्यक्ष उमेशलाल श्रेष्ठले उम्मेदवारी दिएका छन् । यसैगरी कोषाध्यक्षमा रतन टण्डन र उपमहासचिवमा पीताम्बर तिमल्सिना निर्विरोध निर्वाचित भइसकेका छन् । यसैगरी पाँच उपाध्यक्ष पदका लागि आठ, एक महासचिवका लागि दुई, तीन सचिवका लागि चार र सात सदस्यका लागि आठजनाले उम्मेदवारी दिएका छन् ।
एनओसीको नयाँ विधानअनुसार १९ सदस्यीय कार्यसमितिका लागि निर्वाचन हुनेछ । निर्वाचनमा विभिन्न २७ वटा राष्ट्रिय संघका प्रतिनिधिले मतदान गर्ने व्यवस्था छ । अध्यक्ष पदका उम्मेदवार जीवनराम र उमेशलाल दुवै नेकपाका नेता हुन् । जीवनराम प्रतिनिधिसभाका सांसद र नेकपाका काठमाडौं उपत्यका इन्चार्ज पनि हुन् । उमेशलाल पुष्पलाल र सहाना प्रधानका छोरा हुन् ।
उमेशलाल एनओसीको अघिल्लो निर्वाचनमा जीवनरामसँगै पराजित भएका थिए । जीवनराम स्की संघ र उमेशलाल हक्की संघका अध्यक्ष हुन् । मताधिकार प्राप्त २७ जना प्रतिनिधिमध्ये एनओसीका पूर्वअध्यक्ष एवं नेपाल जिम्न्यास्टिक संघका अध्यक्ष ध्रुवबहादुर प्रधान एकजनाले मात्र कुनै पनि पदमा उम्मेदवारी दिएका छैनन् । लोकभक्त राणाको संयोजकत्वमा गठित तीन सदस्यीय निर्वाचन समितिले एनओसीको निर्वाचन गराउनेछ ।