विश्‍वभर आज : चिनियाँ सीमामा भारतीय सेनाको अत्याधुनिक हतियार, सिरियामा सेना थप्दै अमेरिका

भारतमा डुंगा दुर्घटना हुँदा १२ तिर्थालुको मृत्यु

नयाँदिल्ली : भारतको मध्यप्रदेशस्थित तिर्थयात्रीहरुले भरिएको डुंगा पल्टिँदा १२ जनाको मृत्यु भएको छ । स्थानीय समय अनुसार शुक्रबार बिहान साढे ४ बजे दुर्घटना भएको थियो ।

भोपालस्थित एक तलाउमा हिन्दूहरुका भगवान गणेशको मूर्ति विसर्जन गर्न जाँदै गर्दा २० भन्दा धेरै यात्रु भएको डुंगा पल्टिएको हो । प्रदेश सरकारका सञ्चारमन्त्री पिएस शर्माका अनुसार हिन्दूहरुको आस्थाको चाड गणेश चतुर्थी मनाउने क्रममा तिर्थालुहरु तलाउमा गणेशको प्रतिमा सेलाउन गएका थिए ।

सोमालियामा २० लाख मानिस भोकमरीको जोखिममा

सोमालिया : सोमालियामा २० लाख जति मानिस भोकमरीमा पर्ने खतरा रहेको बताइएको छ । २०११ देखि सोमालियामा यस्तो खतरा निम्तिएको भन्दै संयुक्त राष्ट्रसंघले यस्तो चेतावनी दिएको हो ।

यस्तो समस्याबाट उम्किन राष्ट्रसंघले सहायताका लागि अन्तर्राष्ट्रिय समुदायलाई आग्रह गरेको छ । संयुक्त राष्ट्रसंघका उच्च अधिकारी मार्क लोकले सोमालिया भ्रमणको अन्तिम दिन यसबारे तथ्य पेश गरेका थिए । दशकौं लामो द्वन्द्व र लगानीको अभावका कारण सोमालिया यस्ता मानवीय संकटसँग जुध्न सक्षम नरहेको उनको भनाइ छ ।

भारतीय पूर्वमन्त्रीलाई यौन शोषण आरोपमा ७ घण्टा सोधपुछ

नयँदिल्ली : भारतका पूर्व गृहराज्य मन्त्री स्वामी चिन्मयानन्दसँग करिब ७ कण्टा लामो सोधपुछपछि विशेष अनुसन्धान टोलीले उनको दिव्य आश्रम बन्द गरिदिएको छ ।
शुक्रबार अनुसन्धान टोली पीडित छात्रालाई लिएर उनको निवासमा समेत पुगेको थियो ।

चिन्मयानन्दमाथि उनको एसएस ल क्याम्पसकी एक छात्राले यौन शोषणको आरोप लगाएकी छन् । भारतीय मिडियाका अनुसार चिन्मयानन्द वाहेक अनुसन्धान टोलीले बिहीबार राति उत्तर प्रदेश प्रहरीसँग पनि यौन शोषण केससँग जोडिएका प्रश्न सोधेको थियो ।

चिन्मयानन्दका वकिलले भने अदालतको फैसलालाई सम्मान गर्ने प्रतिक्रिया दिएका छन् । चिन्मयानन्दले केही छात्राहरुलाई यौन शोषण गरेको भन्दै भिडियो सहित एक युवतीले गत अगस्टमा आरोप लगाएकी थिइन् ।

चिनियाँ सिमानामा अमेरिकी अत्याधुनिक हतियार राख्दै भारतीय सेना

नयाँदिल्ली : भारत र चीनको सीमाक्षेत्र अरुणाञ्चलस्थित अमेरिकी अत्याधुनिक हतियार राख्ने बताइएको छ । विवादित क्षेत्र लद्दाखस्थित भारतीय सेनाले चिनुक हेभी लिफ्ट हेलिकप्टर, एम ७७७ अल्ट्रालाइट होविटजर जस्ता अमेरिकी अत्याधुनिक हतियार तैनाथ गर्ने तयारी गरेको हो ।

हालै भारतीय र चिनियाँ सेनाबीच भीडन्त भएपछि भारतबाट यस्तो योजना सार्वजनिक भएको अन्तर्राष्ट्रिय मिडियाले जनाएका छन् । ‘इकोनोमिक टाइम्स’ का अनुसार भारतले अरुणाञ्चलस्थित सीमा क्षेत्रमा सैन्य अभ्यास गर्ने तालिका समेत बनाएको छ । यसअघि पनि पटक पटक चिनियाँ सेना र भारतीय सेनाबीच दोहोरो भिडन्त भइसकेको छ ।

सिरियामा १ सय ५० सैनिक तैनाथ गर्दै अमेरिका

वासिङ्टन : अमेरिकाले सिरियाको उत्तरपूर्वी क्षेत्रस्थित १ सय ५० सैनिक पठाउने तयारी गरेको छ । अमेरिकी रक्षा मन्त्रालयले त्यहाँ टर्कीस सुरक्षा फौजसँग स्थल गस्तीका लागि सैनिक पठाउने तयारी गरेको हो । डोनल्ड ट्रम्पले गत वर्ष सिरियाबाट सैनिक फिर्ता बोलाउने घोषणा गरे पनि यस पटक अस्थायी रुपमा गस्तीका लागि सैनिक पठाउन लागेको बताइएको छ ।

'प्लम्बर'लाई अपहरण गरेको अभियोगमा साउदी राजकुमारीलाई सजाय

पेरिस : फ्रान्समा एक कामदारलाई अपहरण गरी कुटपिट गरेको अभियोगमा साउदी राजकुमारीलाई यहाँको अदालतले जेलसजाय र ११ हजार डलर जरिवाना तोकेको छ ।

साउदी राजाकी छोरी हास्सा बिन्त सलमानले अंगरक्षकलाई लगाएर पेरिसस्थित अपार्टमेन्टमा एक प्लम्बरलाई कुटपिट गराएको भन्दै मुद्दा दायर भएको थियो । ती व्यक्तिले आफूलाई बाँधेर यातना दिइएको पनि आरोप लगाएका थिए । मुद्दापछि राजकुमारीलाई पक्राउ पुर्जी जारी गरिएको थियो ।

इजिप्टका ती नागरिकले आफूलाई घण्टौँसम्म थुनेर कुटपिट गराएको आरोप लगाएका थिए । २०१८ मार्चमा यस्तो घटना भएको भन्दै मुद्दा अदालतमा पुगेपछि राजकुमारी हास्सालाई पक्राउ पूर्जी जारी गरिएको हो । तर उनीमाथिको फैसला शर्त सहित तत्कालै लागु नहुने गरी गरिएको छ ।

ट्युनिसियाका नेता अस्पतालमा

ट्युनिसिया : ट्युनिसियामा हटाइएका राष्ट्रपति जीन एल अबिदिन बेन अली अचानक अस्पताल भर्ना भएका छन् । २०११ देखि बन्दी जीवन बिताउँदैआएका उनको स्वास्थ्यमा संकट आएपछि अस्पतालमा पुगेका थिए ।

मिडियाहरुका अनुसार उनी क्यान्सरबाट पीडित छन् । उनको वकिलको हवाला दिँदै अन्तर्राष्ट्रिय मिडियाले उनको स्वास्थ्य अवस्था नाजुक रहेको उल्लेख गरेका छन् । उनको स्वास्थ्यबारे पहिलो पटक यसरी सार्वजनिक रुपमा समाचार आएको हो । शक्तिमा रहेका नेता जीन २०११ मा अपदस्थ भएका हुन् ।

क्युवामा अधिकांश पत्रकारको ट्वीटर एकाउन्ट बन्द

क्युबा : ट्वीटर कम्पनीले क्युबामा नियम उल्लंघन गरेको भन्दै धेरै पत्रकार सहित सामाजिक सञ्जाल प्रयोगकर्ताहरुको एकाउन्ट बन्द गरिदिएको छ । ट्वीटर एकाउन्ट बन्द हुनेमा अधिकांश सरकारी मिडियाका पत्रकार छन् ।

उनीहरुले ट्वीटरको नियम उल्लंघन गरेको भनिए पनि कसरी, कुन ठाउँबाट भनी ट्वीटरले यकिन गरेको छैन । यसरी प्रतिबन्ध लगाइनेमा कम्युनिस्ट पार्टीका नेता राउल क्यास्त्रोकी छोरी सहित अन्य कार्यकर्ता समेत छन् ।