प्यूठान : प्यूठान, गुल्मी र अर्घाखाँचीको सीमाक्षेत्रमा पर्ने झिमरुक गाउँपालिका १ सौतामारे प्यूठानका स्थानीयले प्रहरीचौकी स्थापनाको माग गरेका छन् ।
जुन २०११ मा स्थापना भइ पछि फेरि विस्थापित भएको थियो । स्थानीय जंगलमा लागेको डढेलोबाट खरले छाएको चौकी नै जलेपछि विस्थापित भएको थियो । गाउँलेले भने अहिले फेरि उक्त प्रहरीचौकी स्थापना गर्नुपर्ने माग राखेका हुन् ।
यस क्षेत्रकै पहिलो स्थापित चौकी हटेपछि आफूहरु निराश भएको स्थानीयको गुनासो छ । हरेक दिन हिंसाजन्य घटना बढ्दैगएको भन्दै चौकी स्थापनाको आवश्यकता देखिएको स्थानीय बताउँछन् ।
छिमेकी जिल्ला गुल्मी र अर्घाखाँचीको प्रहरीचौकी नजिकै भए पनि प्यूठानको भूगोगलमा घटना भएमा सम्बन्धित जिल्लाबाटै प्रहरी आउनुपर्ने बाध्यताले समस्या भइरहेको वडाध्यक्ष धुर्वराज खनालले बताए ।
‘मानवीय हिसावले प्रहरी आउने कुरा फरक । तर जुन जिल्लामा घटना घट्छ उही जिल्लाकै प्रहरीले मुचुल्का उठाउनुपर्ने बाध्यता छ,’ खनालले भने । गाउँमा पछिल्ला केही वर्षदेखि घरेलु हिंसा, झै–झगडा, आगलागी, चोरी लगायत हिंसाजन्य घटना बढ्दैजान थालेकाले चौकी स्थापना हुनुपर्ने उनले बताए । सिमानाको क्षेत्रमा विभिन्न जिल्लाका पर्यटक घुम्न आउने गरेको उनको भनाइ छ । सौतामारे सालझण्डी–ढोरपाटन र मदान भण्डारी राजमार्ग सडक खण्डमा पर्छ ।
प्रतिक्रिया दिनुहोस !
