काठमाडौं : भूमि, व्यवस्था, सहकारी तथा गरिबी निवारण मन्त्री पद्माकुमारी अर्यालले हदबन्दीमा सरकार लचिलो भएको स्वीकार गरेकी छन् । उनले उद्योगधन्दा खोल्न बाधा नहोस् भनेर हदबन्दीमा लचिलो हुनुपरेको स्पष्टिकरण दिएकी छन् ।
‘उद्योग, फर्म सञ्चालनको लागि भूमि सम्बन्धि व्यवस्था हात खुट्टा बाँध्यो भन्ने कुरा थियो । त्यसका लागि हदबन्दी बाधा नहोस् भनेर थोरै लचिलो भएका हौँ ।’उनले भनिन् । सरकारको तीन खम्बे नीति सरकारी, सहकारी र निजी क्षेत्रसँगै लैजानको लागि भूमि समस्या नहोस् भनेर हदबन्दी खुकुलो गरिएको बताइन् ।
मन्त्री अर्यालले भूमिहीन, सुकुम्बासी, अव्यवस्थित बसोबासको समस्या समाधान गर्न बनेका भूमि सम्बन्धी ऐनका विषयमा अनावश्यक हल्ला गरेको बताइन् । उनले सरकारले लामो समयपछि भूमिसम्बन्धी विधेयकमा रहेका राम्रा पक्षको चर्चा नै नगरेर एउटा विषयलाई मात्र बढी उछालिएको आरोप लगाएकी छन् । उनले यस्ता विषयले भूमिहीन, सुकुम्बासी, अव्यवस्थीत बसोबासीलाई धराप पार्ने काम गरेको बताइन् ।
उनले नेपालीलाई जग्गा धनी बनाउने घोषणा गरेकी छन् । अब कोही पनि मोही नरहने बताउँदै उनले भनिन्,‘ अब कोही पनि मोही रहने छ्र्रैनन्, सबैलाई जग्गाधनी बनाउने हो ।’उनले मोहियानी हक स्थापित गरेर उनीहरुलाई न्याय दिने बताइन् ।
सामुदायिक आत्मनिर्भर सेवा केन्द्रले आयोजना गरेका कार्यक्रममा मन्त्री अर्यालले भू उपयोग ऐन प्रमाणिकरण भइसकेकोले अब कार्यान्वयनमा जाने बताएकी छन् । उनले अब कसैले कृषि योग्य जमिन बाँझो राख्न नपाउने बताइन् ।
उनले जथाभावी कित्ताकाट जग्गा टुक्राटुक्रा भएको बताउँदै भनिन, ‘अब जग्गा टुक्राउने होइन, व्यवस्था पनि हो ।’उनले भूमि बैंक पनि परिकल्पना गरिएको जानकारी दिएकी छन् ।
प्रतिक्रिया दिनुहोस !
