परासी : बजार क्षेत्रमा रहेका छाडा चौपाय व्यवस्थापन गर्न नगरपालिकाले बेवास्ता गर्दा समस्या उत्पन्न भएको छ । छाडा चौपायाका कारण सवारी दुर्घटनाको संभावना बढ्दै गएको छ भने पैदलयात्रीहरुलाई समेत आवतजावतमा समस्या उत्पन्न भएको छ ।
महिना दिनअघिदेखि सदरमुकाम परासी र वरपरका क्षेत्रमा छाडा चौपायको संख्या बढ्दै गए पनि रामग्राम नगरपालिकाले त्यसको व्यवस्थापन गर्न कुनै चासो नदेखाएको स्थानीयको गुनासो छ । छाडा चौपायले बालीनालीमा नोक्सानी पुर्याउन थालेपछि किसानहरु चिन्तित हुन थालेका छन् । खेतमा बालीनाली खाने चौपायलाई धपाए पनि पुनः फर्केर नोक्सानी पुर्याउने गरेको रामग्राम नगरपालिकाका किसान रामकिसुन गुप्ताले बताए । छाडा चौपाय व्यवस्थापन गर्ने जिम्मा स्थानीय तहको भए पनि बेवास्ता गर्दा चौपायको संख्या दिनप्रतिदिन बढ्दो छ ।
सीमावर्ती भारतीय क्षेत्रबाट लखेटिएका र केही नेपाली किसानहरुले छाडेका चौपायहरु त्यसरी आउने गरेको स्थानीयको भनाइ छ । एक स्थानमा रहेका ठूलो संख्याका चौपायहरुलाई केही व्यक्तिले एकीकृत गरी बजार क्षेत्रको जंगलमा छाडिदिने र ती चौपायहरु बजार क्षेत्रमा आउने गरेको रामग्राम नगरपालिकाका प्रमुख नरेन्द्रकुमार गुप्ताले बताए ।
नगर क्षेत्रमा अहिले २ सय बढी छाडा चौपाय रहेको नगरपालिकाको अनुमान छ । यी चौपायहरु सडकको बीचमै बस्ने गरेका कारण सवारी आगमनमा समेत अवरोध हुने गरेको छ । केही दुर्घटना छाडा चौपायकै कारण हुने गरेको पाइएको छ । नगरपालिका र प्रशासनको समन्वयमा छाडा चौपाय व्यवस्थापन गर्नका लागि पहल भइरहेको नगर प्रमुख गुप्ताले बताए ।
‘बजारमा देखिएका छाडा चौपायले समस्या पारेको छ । त्यसको व्यवस्थापनका लागि गौशाला र चरन क्षेत्रको खोजी गरिरहेका छौं’, गुप्ताले भने । दुध दिने बेलासम्म गाई पाल्ने र त्यसपछि छाड्ने प्रवृत्ति र काम गर्न नसक्ने भएपछि गोरुहरुलाई बेवारिसे गरेर छाड्ने प्रवृत्तिले सडकमा त्यसको संख्या बढ्दै गएको नगरपालिकाले जनाएको छ ।
प्रतिक्रिया दिनुहोस !
