रुकुम : करिब पाँच किलो लागुऔषध अफिमसहित रुकुम पश्चिम प्रहरीले एकजनालाई पक्राउ गरेको छ । जिल्लाको बाँफिकोट गाउँपालिका-७ नदुवाबाट ४ किलो ९ सय ग्राम लागुऔषध अफिमसहित सानीभेरी गाउँपालिका-५ गोलचौरका ३२ वर्षीय रन्जीत खत्रीलाई पक्राउ गरिएको जिल्ला प्रहरी कार्यालयले जानकारी दिएको छ।
मंगलबार राति बाँफिकोट गाउँपालिका-७ मा रहेको नवज्योती आधारभूत विद्यालय नजिकै अफिम बोकेर हिँडिरहेको अवस्थामा पक्राउ गरिएको जिल्ला प्रहरी कार्यालय रुकुम पश्चिमका प्रमुख प्रहरी नायव उपरीक्षक सुमित खड्काले जानकारी दिए ।
अवैध लागूऔषध ओसारपसार तथा खरिद बिक्री भइरहेको विशेष सूचनाको आधारमा जिल्ला प्रहरी कार्यालयबाट खटिएको विशेष टोलीले उनीहरुलाई पक्राउ गरिएको उनले बताए । खत्रीलाई पक्राउ गर्न खोज्दा भाग्न थालेपछि एक राउण्ड हवाइ फायर गर्नुपरेको डिएसपी खड्काले बताए ।
उनको सातबाट स्प्रिङ तराजु एक थान र मोबाइल एक थान नियन्त्रणमा लिइएको प्रहरीले बताएको छ । पक्राउ परेका खत्रीलाई बुधबार जिल्ला प्रहरी कार्यालयमा सार्वजनिक गरिएको थियो । उनी विरुद्ध लागुऔषध ओसारपसार सम्बन्धि मुद्दा दर्ता गरेर आवश्यक अनुसन्धान भइरहेको डिएसपी खड्काले जानकारी दिए ।
प्रतिक्रिया दिनुहोस !
