विश्वभर आज : अमेरिकाको आक्रोश, बेलायती राजकुमार दम्पती किन पुगे पाकिस्तान ?
काठमाडौँ : मध्यपूर्वमा द्वन्द्व जारी छ । यसको असर अमेरिकासम्मै पुगेको छ । हालै अमेरिकाले टर्कीमाथि प्रतिबन्ध घोषणा गरेको छ । उता बेलायती राजकुमार र उनकी पत्नी पाकिस्तान भ्रमणमा छन् । मेक्सिकोमा एम्बुसमा परी प्रहरी अधिकृतहरुको ज्यान गएको छ । यस्तै प्रस्तुत छ, विश्व राजनीतिलाई तरंगित बनाउने सात समाचार :
सिरिया : सिरियामा टर्कीले आक्रमण गरेसँगै अमेरिकाले विरोध जनाएको छ । अमेरिकी राष्ट्रपति डोनल्ड ट्रम्पले टर्कीमा प्रतिबन्ध लगाउन निर्देशन दिएका छन् । टर्कीको गतिविधिप्रति रुष्ट हुँदै अमेरिकाले स्टीलमा कर बढाउने र व्यापार सम्झौता सम्बन्धी वार्ता रोक्ने चेतावनी समेत दिएको छ ।
अमेरिकी राष्ट्रपति ट्रम्पले टर्कीप्रति आक्रोशित हुँदै यदी टर्कीका नेताहरुले ध्वंसात्मक बाटो अपनाए त्यहाँको अर्थतन्त्र ध्वस्त पार्न आफू तयार रहेको प्रतिक्रिया दिएका छन् । ट्रम्पले यसअघि नै टर्कीका राष्ट्रपति रेजेप ताइयिप एर्दोआनलाई टेलिफोन गरेरै युद्धविाम गर्न आग्रह गरिसकेका थिए ।
मेक्सिकोमा एम्बुस आक्रमणबाट १४ प्रहरी अधिकृत मारिए
मेक्सिको सिटी : मेक्सिकोमा १४ जना प्रहरी अधिकृत एम्बुस आक्रमणमा मारिएका छन् । साथै ९ जना घाइते छन् । लागुऔषध तस्करहरुको प्रभावित क्षेत्र पश्चिमी मिकोअकनमा हतियारधारी समूहले राखेको एम्बुसमा उनीहरुको ज्यान गएको हो ।
प्रहरी अधिकृतहरुलाई लक्षित गर्दै हतियारधारीहरुले गोली प्रहार समेत गरेका थिए । रक्षा मन्त्रालयका अनुसार सरकारले घटनाको बारेमा छानविन गरिरहेको छ ।
कोरियाली अभिनेत्री आफ्नै निवासमा मृत भेटिइन्
सोल : दक्षिण कोरियाली पपस्टार तथा अभिनेत्री सुली आफ्नै निवासमा मृत भेटिएकी छन् । २५ वर्षीया सुलीलाई प्रहरीले मृत अवस्थामा फेला पारेको जनाएको छ ।
स्योङनामस्थित सुलीकै निवासमा उनका म्यानेजर पुग्दा उनलाई मृत अवस्थामा भेटिएको हो ।
प्रहरीले भने घटनास्थलमा कुनै ‘सुसाइड नोट’ वा आत्महत्याका कुनै प्रमाण नभेटेको बताएको छ । साथै अनुसन्धान गरिरहेको प्रहरीले जनाएको छ । सुलीको वास्तविक नाम चोरी जिन री हो । २००९ देखि गायन तथा अभिनयमा सक्रिय सुली ‘एफ एक्स ब्यान्ड’मा आवद्ध थिइन् । उनले केही फिल्म साथै टेलिभिजन नाटकमा समेत अभिनय गरिसकेकी छिन् ।
बेलायती राजकुमार दम्पती पाकिस्तान भ्रमणमा
इस्लामाबाद : बेलायती राजकुमार विलियम र उनकी पत्नी केट पाकिस्तान भ्रमणमा छन् । हरियो सलवार कमिजमा सजिएकी केट र गाढा कालो सुटमा सजिएका विलियमलाई पाकिस्तानी विदेशमन्त्री शाह मेहमुद कुरैसीले फूलका गुच्छासहित स्वागत गरेका थिए ।
रावलपिण्डीस्थित सैनिक क्याम्पमा अवतरण गरेका उनीहरुको सुरक्षाका लागि पाकिस्तान सरकारले उच्च सुरक्षा सतर्कता अपनाएको छ । बेलायती राजकुमारको पहिलो औपचारिक पाकिस्तान भ्रमण पाँच दिनको हुनेछ ।
यसअघि २००६ मा विलियमका बावु चाल्र्स र उनकी पत्नी क्यामिला पाकिस्तान पुगेका थिए । विलियमको जोडी लाहोरमा रहेको पौराणिक मुगल राजधानी साथै अफगान सीमा जोडिने हिमाली क्षेत्रहरु भ्रमण गर्ने कार्यक्रम तय भएको छ । यस्तै उनीहरुले पाकिस्तानी प्रधानमन्त्री इमरान खानलाई पनि भेट्ने कार्यतालिका छ । भारतीय मिडियाले भने यो भ्रमणबाट प्रेरित भएको टिप्पणी पनि गरेका छन् ।
‘बुकर प्राइज’ दुई लेखिकालाई
लण्डन : बेलायतको प्रतिष्ठित साहित्यिक पुरस्कार मानिने यस वर्षको ‘बुकर प्राइज’ दुई लेखिकाले पाएका छन् । यससँगै बुकरका निर्णयकले आफ्नो नियम नै तोडेका छन् ।
दुईजनाले यसरी बुकर प्राइज बाँडेको यो पहिलो घटना हो । मार्गरेट एटवुड र बेर्नार्डिने एबारिस्टोले संयुक्त रुपमा बुकर पाएका हुन् । एटवुड र एबारिस्टोले अब ५० हजार पाउण्ड रकम बाँड्नेछन् । यससँगै ७९ वर्षीया एटवुड बुकर पाउने अहिलेसम्मकै बृद्धा हुन् भने ३० वर्षीया एबारिस्टो पहिलो अस्वेत महिला हुन् ।
जापानमा मृत्यु हुनेको संख्या ६४
टोक्यो : जापानमा आएको शक्तिशाली आँधी ‘हगिबिस’का कारण मृत्यु हुनेको संख्या ६४ पुगेको छ । जापानी मिडियाले जनाए अनुसार मृतकको संख्या बढ्न सक्नेछ ।
अरु कैयौं हराइरहेका छन् । साथै हजारौं मानिस पानी, बिजुली जस्ता दैनिक उपभोग्य वस्तुको अभावमा बाँचिरहेका छन् ।
यद्यपि सरकारले दशौं हजारको संख्यामा उद्धारकर्मी खटाएको छ । ‘हगिबिस’ नाम दिइएको उक्त आँधी जापानमा ६ दशकयताकै शक्तिशाली मानिएको छ ।
स्पेनमा पूर्व उपराष्ट्रपतिसहित ११ नेतालाई जेल सजाय
म्याड्रिड : स्पेनको सर्वोच्च अदालतले एक पूर्व उपराष्ट्रपति सहित ११ नेतालाई जेल सजाय तोकेको छ । पूर्व उपराष्ट्रपति ओरिएल जान्क्वेरस सहित ११ जना नेतालाई १३ वर्षसम्मको जेल सजाय तोकिएको हो ।
२०१७ मा भएको जनमत संग्रहको क्रममा देशद्रोही भूमिका खेलेको अभियोग उनीहरुमाथि छ । स्पेनको क्याटलिन क्षेत्रलाई अलग बनाउने भन्दै पृथकतावादी नेताहरु आन्दोलनमा उत्रिएका थिए । जसमध्ये ११ नेताहरुलाई देशद्रोहको अभियोग लागेको हो ।
यसवाहेक उनीहरुमाथि सरकारी सम्पत्तिको दुरुपयोगको मुद्दा समेत लागेको छ । यस क्रममा पूर्व राष्ट्रपति ओरिएललाई १३ वर्षको जेल सजाय सुनाइएको छ भने अन्य नेताहरुलाई ९ देखि १३ वर्षको जेल सजाय सुनाइएको हो ।