इलाम : नेपालका उत्पादन नेपालकै लोगोमा खरिद गर्न संयुक्त अरब इमिरेट्स (यूएई) इच्छुक देखिएको छ । यूएईका राजदूत साइद हमदान मोहम्मल अल नक्वीले नेपालका उत्पादन सिधा यूएई पठाउने मार्गबारे सोच्न नेपाललाई सुझाव दिएका छन् ।
नेपालका वस्तु भारतको लोगोमा आफ्नो देशमा प्रयोग भइरहेको उनले सुनाएका छन् । ब्रान्डिङ, लेबलिङ र प्याकेजिङ गरी नेपाल आफंैले निर्यात गर्न सक्ने उनको भनाइ छ ।
‘नेपाल आफैंले पठाउन सक्छ । यसका लागि नेपालले सोच्नुपर्छ । यूएई सहयोग गर्न तयार छ’, इलाम घुम्न आएका उनले सूर्योदयमा आयोजित कार्यक्रममा भने । यूएईले चीन, भारत र पाकिस्तानलगायत देशबाट खाद्य पदार्थ सोझै आयात गर्दै आएको उनले उल्लेख गरे । यसमा नेपाल छुट्न नहुने उनको भनाइ थियो । नेपालको विकासमा सहकार्य गरिरहेको यूएईले थप लगानीको अवसर खोजी गरिरहेको उनले बताए ।
उनीसँगै आएका साउदी अरेबियाका राजदूत मुसैदविन सुलेइमन आई मारवानले भूकम्पपछिको पुनर्निर्माणमा सहयोग गरेको उल्लेख गरे । नेपालको शिक्षा, स्वास्थ्यलगायत क्षेत्रमा थप सहयोग गर्ने विषयमा छलफल भइरहेको उनको भनाइ थियो ।
नेकपा वरिष्ठ नेता एवं पूर्वप्रधानमन्त्री झलनाथ खनालले यूएई र साउदी अरबयामा इलामका उत्पादन चिया, अदुवा र अलैंची व्यापारको ढोका खोल्न भ्रमण फलदायी हुने बताए । ‘चिया, अलैंची र अदुवाका लागि अरब ठूलो बजार हो’, उनले भने, ‘हामी त्यही बजारको सम्भावना खोज्न उहाँ (राजदूत)हरूसँग इलाम आएका छौं ।’
दुई राजदूत र खनालसहितको टोली माईपोखरी रामसार क्षेत्र हुँदै पर्यटकीय गन्तव्य सन्दकपुरसम्म पुग्ने खनालका स्वकीय सचिव कृष्ण भट्टराईले बताए ।
प्रतिक्रिया दिनुहोस !
