म्याग्दीमा बस दुर्घटना : चारजनाको मृत्यु, २६ घाइते (अपडेट)
कात्तिक १८, २०७६ सोमबार १३:१६:०
बेनी : म्याग्दीको मालिका गाउँपालिका ७ बिममा आइतबार साँझ बस दुर्घटना हुँदा चारजनाको मृत्यु भएको छ । २६ जना घाइते भएका छन् । दरवाङ बजारदेखि बिम जाँदै गरेको ग १ ख ४४७६ नम्बरको बस लुरवाङको गलघण्टी भन्ने ठाउँमा दुर्घटना हुँदा चार जनाको घटनास्थलमै मृत्यु भएको जिल्ला प्रहरी कार्यालय म्याग्दीका प्रहरी निरीक्षक ध्रवप्रसाद शर्माले बताए ।
मालिका गाउँपालिका ७ बिमकी ७० वर्षीया सतदेवी भट्टचन, ११ वर्षीया आयुसा जुग्जाली र अन्दाजी ८ वर्षीय रवी जुज्गालीको सनाखत भएको छ । एक महिलाको सनाखत हुन सकेको छैन्। आयुसा किसानी माविको कक्षा ६ र रवी कक्षा ३ मा पढ्ने विद्यार्थी भएको शिक्षक लक्ष्मण गौतमले बताए ।
२१ जना घाइतेको प्राथमिक उपचार केन्द्र दरवाङमा उपचार गरिएको छ । पाँचजना घाइतेलाई थप उपचारका लागि बेनी अस्पताल रिफर गरिएको इलाका प्रहरी कार्यालय दरवाङका प्रहरी निरीक्षक रामप्रसाद पाण्डेले बताए ।
घाइतेहरुमा मालिका–७ बिमका ६० राजमान दर्जी, ५३ का हुमबहादुर जुग्जाली, ३८ वर्षीय पलप्रसाद जुग्जाली, २६ वर्षीया नरदेवी परियार, २६ वर्षीय दिलु शेरपुञ्जा, ६ वर्षीया कृष्टिना जुग्जाली, ६१ वर्षीय तनदेवी जुग्जाली, ६० वर्षीय चन्द्रकली दर्जी, ३८ वर्षीय पलदेवी जुग्जाली रहेका प्रहरीले जनाएको छ ।
बिमकै अन्दाजी वर्ष १७-१८ का सुरेश जुग्जाली, ३१ वर्षीया लीला जुग्जाली, धवलागिरी गाउँपालिका ३ दरकी १८ वर्षीय रिलमाया बुढा, बेनी नगरपालिका ३ भकिम्लीका ३५ वर्षीय केशव शर्मा न्युरे, मंगला गाउँपालिका ५ छिस्वाङका २२ वर्षीया रमिला खत्री, बेनी नगरपालिका ९ घतानका बिसन खत्री, बेनी ४ राक्सेका १७ वर्षीय गौरब पौडेल, १९ वर्षीय प्रमिस पौडेल र ताराखोला गाउँपालिका ५ का १७ वर्षीय बिजय कडेलको दरवाङमा उपचार गरिएको छ।
स्थानीयबासी, जनप्रतिनिधि र सुरक्षाकर्मी उद्धारमा खटिएका थिए । करिब सवा छ बजेतिर दुर्घटना भएको थियो । अध्याँरोका कारण उद्धारमा समस्या भएको थियो । बेनीबाट बिमका लागि छुटेको बस दरवाङमा पुगेर बिग्रिएपछि यात्रुलाई अर्को बसमा चढाएर बिम पठाइएको थियो । सोही बस दुर्घटना भएको हो।
घुम्तीमा बस टर्निङ हुन नसकेपछि ब्याक गर्ने क्रममा ब्रेक नलागेपछि बस अनियन्त्रित भई उल्टो गुड्दै खसेको प्रत्यक्षदर्शी यात्रु टिककुमार पाइजाले बताए । बसमा तीसजना यात्रु सवार थिए । दुर्घटनापछि फरार भएका चालकको खोजी भइरहेको प्रहरी निरीक्षक शर्माले बताए।
प्रतिक्रिया दिनुहोस !
