'पूर्खा लडे नालापानी, हामी लड्छौं कालापानी' भन्दै विद्यार्थीले गरे विराटनगरमा प्रदर्शन

विराटनगर : विद्यार्थीले रेल र पानी जहाजभन्दा पनि भारतले मिचेको जमिन फिर्ता गर्नु नेपाल सरकारको पहिलो प्राथमिकता रहेको बताएका छन्। विराटनगरमा नेपाल विद्यार्थी संघसम्बद्ध विद्यार्थीले मंगलबार भारतले आफ्नो नयाँ नक्सामा पारेको कालापानी, लिपियाधुरा र लिपुलेक फिर्ता गराउन माग गर्दै गरेको प्रदर्शनमा विद्यार्थीले यस्तो माग राखेका हुन् । 

प्रदर्शन गर्दै विद्यार्थीले 'पूर्खा लडे नालापानी, हामी लड्छौं कालापानी, 'जमिन मिच्न पाइँदैन, दुष्ट छिमेकी चाँहिदैन', 'भारतीय विस्तारवाद मुर्दावाद' जस्ता भारतविरोधी नारा लगाएका थिए । व्यवस्थापन क्याम्पस इकाइको आयोजनामा प्रदर्शन गर्दै संघले नगर परिक्रम गरेर जिल्ला प्रशासन कार्यालय मोरङमार्फत प्रधानमन्त्रीलाई ज्ञापनपत्र पठाएको छ । 

संघका इकाइ सभापति अनिल खाँ र सचिव शेखर बुढाथोकीले हस्ताक्षर गरेको ज्ञापन पत्रमा लिपियाधुरा, कालापानी, लिपुलेक जस्ता ऐतिहासिक भू-भागलाई फिर्ता गर्न पहलका लागि प्रधानमन्त्रीको ध्यानाकर्षण गरिएको छ ।

त्यस अवसरमा नेविसंघ सम्बद्ध विद्यार्थीले बरु अहिले रेल र पानी जहाज नचाहिएको बरु भारतले मिचेको जग्गा फिर्ता हुनु पर्ने भन्दै प्रधानमन्त्री केपी शर्मा ओलीको ध्यानाकर्षण गराएका छन् ।

नेविसंघका विद्यार्थी नेता पवन भट्टराईले अहिले रेल र पानी जहाज भन्दा पनि नेपालीलाई लिपुलेक, कालापानी र लिपियाधुरा फिर्ता चाहिएको बताए । उनले प्रधानमन्त्रीले आफ्ना समकक्षी भारतीय प्रधानमन्त्रीसँग छलफल गरी नेपाली भूमि फिर्ता गराउन चाँडै पहल थाल्नु पर्ने माग राखे । 

नेविसंघका पूर्वसहमहामन्त्री कृष्ण कार्कीले नेपाली भूमि फिर्ता गराउन प्रधानमन्त्रीले दह्रो खुट्टा टेक्नुपर्ने र त्यसमा जनताले साथ दिने सुझाव दिए । 'सर्वदलीय छलफलबाट पनि प्रधानमन्त्रीलाई अघि बढ्न बाटो खुल्ला भइसकेको छ,' कार्कीले भने, 'प्रधानमन्त्रीले पहल थालेपछि उहाँलाई सबैको साथ र समर्थन रहन्छ ।'
 
यसैगरी नेपाली भूमि मिचिएको विरोधमा विद्यार्थीहरुको अर्को समूहले विराटनगरको महेन्द्र मोरङ क्याम्पसबाट र्‍याली निकालेको छ । र्‍याली जिल्ला प्रशासन कार्यालय मोरङ अगाडि आएर विरोध सभामा परिणत भएको थियो । र्‍यालीमा सहभागी विद्यार्थीले भारतको रवैयाले नेपालमाथि जहिले पनि थिचोमिचो हुने गरेको भन्दै आक्रोस पोखेका थिए ।