बेनी : म्याग्दीको रघुगंगा गाउँपालिकाले बालविवाह न्यूनीकरणका लागि छोरी जन्मिए मासिक एक सय रुपैयाँ दिन थालेको छ । बालविवाह न्यूनीकरण, संस्थागत प्रसूति सेवालाई प्रोत्साहन, सहकारीको प्रवद्र्धन, बचत गर्ने बानीको विकास, गर्भमा लिंग पहिचान गरेर भ्रूण हत्या गर्ने र लैंगिक विभेदको सामाजिक समस्या घटाउन ‘छोरी पेवा बचत कार्यक्रम’ सुरु गरेको हो ।
वडा नं. ३ पिप्लेका रवीन्द्र र संगीता मल्लकी छोरी सप्रियाको नाममा स्थानीय महिला सहकारी संस्थामा खाता खोली रकम जम्मा गरेर कार्यक्रम कार्यान्वयन गरेको वडा सदस्य सम्झना परियारले बताइन् । आठवटै वडामा गाउँपालिकाले तोकेको सहकारी संस्थामा छोरीका नाममा खाता खोलेर गाउँपालिका र अभिभावकले मासिक एक÷एक सय रुपैयाँका दरले बचत गर्ने कार्यविधि बनाइएको छ । गाउँपालिकाले १० वर्षसम्म र अभिभावकले २० वर्षसम्म मासिक रूपमा खातामा जम्मा गर्ने पैसा छोरी २० वर्ष पुगेपछि मात्र निकाल्न पाउनेछन् ।
गाउँपालिकाका अध्यक्ष भवबहादुर भण्डारीले आफूले पाउने पारि श्रमिकबाट स्थापना गरेको अक्षयकोषबाट हरेक दम्पत्तिका एक छोरीलाई आफ्नो कार्यकाल सकिएपछि पनि निरन्तरता पाउने गरी थप मासिक १ सय रुपैयाँका दरले उपलब्ध गराउने निर्णय गरेका छन् । यस्तो सुविधा पाउन दुई सन्तान मात्र जन्माउनुपर्ने, स्वास्थ्य संस्थामा प्रसूति हुनुपर्ने, २० वर्षअघि विवाह गर्न नपाउने, अभिभावकले बचतलाई २० वर्षसम्म निरन्तरता दिनुपर्ने शर्त पालना गर्नुपर्ने उनले बताए ।
खाता खोलिने सहकारी संस्थाले नियमअनुसार लेखापरीक्षण, साधारणसभा र अधिवेशन गरेको हुनुपर्नेछ । ‘कार्यक्रम सानो भए पनि यसले धेरै आर्थिक र सामाजिक पक्षलाई समेट्न खोजेको छ’, अध्यक्ष भण्डारीले भने । २० वर्षअघि शिक्षाका लागि आवश्यक परेर खातामा जम्मा भएको पैसा निकाल्नु परेमा गाउँपालिकाको स्वीकृति लिनुपर्नेछ । शर्त पालना नगरे खातामा अभिभावकले जम्मा गरेको पैसासमेत गाउँपालिकाले नै फिर्ता लिनेछ ।
प्रतिक्रिया दिनुहोस !
