ह्वाइट हाउसमा आतंकवादीलाई खोज्ने कुकुरको प्रशंसा
वासिङ्टन : अमेरिकी राष्ट्रपति डोनल्ड ट्रम्प र उनकी पत्नी मेलानिया ट्रम्पले हालै ह्वाइट हाउसमा एउटा कुकुरलाई निकै महत्वसाथ स्वागत गरे ।
त्यस कुकुर अरु नभएर सैन्य तालिम पाएको कोनन थियो । जसले इस्लामिक स्टेटका नेता अबु बकर अल बगदादी विरुद्ध 'सर्च अपरेशन'मा बगदादीलाई खोज्ने काम गरेको थियो । ह्वाइट हाउसको रोज गार्डेनमा पत्रकारहरुसँग ट्रम्पले भने, 'कोनन वास्तवमा स्मार्ट छ । हामीले उसँग धेरै सुन्दर समय बितायौँ । उसले शानदार काम पनि गरेको छ । र उसलाई पाएर हामी गर्व महसुश गर्छौँ ।'
बगदादीलाई खोजेकोमा कोननले पदक र सम्मान समेत पाइसकेको छ । जसको पुरस्कार ह्वाइट हाउसमै राखिएको छ ।
कोनन बेल्जियम जातको कुकुर
बगदादीको मृत्युपछि ट्रम्पले कोननको समेत तस्बिर सार्वजनिक गरेका थिए । पदक प्रदान गर्दै ट्रम्पले उक्त कुकुरको तस्बिर 'अमेरिकन हिरो' भन्दै सार्वजनिक गरेका थिए । उनले त्यसबेलै उक्त कुकुर बेल्जियन मालिनोस नश्लको भएको बताएका थिए ।
जुन अहिले अमेरिकी सेनाका लागि अनुसन्धानमा प्रयोग हुँदैआएको छ । अमेरिकी सेनाका अनुसार उक्त कुकुर बगदादीको खोजीका क्रममा घाइते भएको थियो । जसलाई लिएर ट्रम्पले कोननलाई सुन्दर र प्रतिभावान भन्दै प्रशंसा गरेका थिए ।