जाजरकोट : गाउँ पसेर उपर्दो मच्चाउने बँदेल जाजरकोटको कुशेमा मृत अवस्थामा फेला परेको छ । गाउँलेले प्रतिकार गर्दा बदेल मरेको आशंका गरिएको छ। कुशे गाउँपालिका ५ खुर्पामा बुधबार दिउँसो जंगलबाट आएको बँदेलले स्थानीय वीरबल कामीलाई आक्रमण गरी घाइते बनाएको थियो। उनका दुई बाख्रा पनि मारिदिएको थियो ।
त्यस्तै, अर्का स्थानीय पठे विष्टको एउटा बाख्रो पनि बँदेलले मारिदिएको प्रहरीले जनाएको छ । बँदेल देखेर भाग्ने क्रममा स्थानीय हरिबहादुर बोहरा र दीपक रावल पनि घाइते भएका छन् । गंभिर घाइते वीरबलको चौरजहारीस्थित मिसन अस्पतालमा उपचार भइरहेको छ ।
उनको शरीरमा १२ वटा टाँका लगाइएको छ । गाउँमा आएर उप्रर्दो मच्चाउन थालेपछि गाउँलेले ढुंगा मुढा गर्दै लखेटेको स्थानीय जयबहादुर विकले बताए । गाउँलेको ढुंगा -मुढा र लखेटाइबाट घाइते भएको बँदेल गाउँ नजिकैको जंगलमा मृत अवस्थमा फेला परेको डिभिजन बन कार्यालय जाजरकोटका प्रमुख महेश कुमाईले बताए ।
स्थानीयले खबर गरेपछि इलाका प्रहरी कार्यालय पाँचकाटियाबाट प्रहरी र डिभिजन बन कार्यालयबाट बन प्राविधिक घटनास्थल पुगेका थिए । मृत अवस्थामा फेला परेको बँदेल ७१ इन्च लम्बाई, ३३ ईन्च उचाई र एक सय ५० केजी तौलको रहेको डिभिजन बन प्रमुख कुमाईले बताए ।
मृत अवस्थाको बँदेललाई सदरमुकामस्थित डिभिजन बन कार्यालय ल्याई पोष्टमार्टम गरेर स्थानीय प्रशासन, सुरक्षा निकाय र सञ्चारकर्मीको रोहवरमा गाडिएको उनले बताए ।
प्रतिक्रिया दिनुहोस !
