भक्तपुर : भक्तपुरको मध्यपुर थिमि नगरपालिका ५ मा पानी बोक्ने गाडीले बिहीबार एक पैदलयात्रीलाई ठक्कर दिँदा पैदलयात्रीको मृत्यु भएको छ ।
महानगरीय प्रहरी परिसर भक्तपुरका अनुसार बा १२ च ५६५६ नम्बरको पानी बोक्ने गाडीले ठक्कर दिँदा पैदलयात्री सिन्धुपाल्चोकको बाह्रबीसे घर भइ हाल मध्यपुर थिमि नपा ६ पुरानो ठिमी बस्ने २५ वर्षीया ज्योति मगरको ज्यान गएको हो ।
गाडीको ठक्करबाट घाइते भएकी मगरलाई तत्काल उपचारको लागि मध्यपुर अस्पताल लगिएको थियो । अस्पतालमा उपचारकै क्रममा उनको मृत्यु भएको परिसरका प्रवक्ता प्रहरी नायब उपरीक्षक रेवतीरमण पोखरेलले जानकारी दिए ।
उनका अनुसार घटनास्थलमा महानगरीय प्रहरी वृत्त ठिमीबाट खटिएको प्रहरी अधिकृतसहितको टोलीले प्रारम्भिक अनुसान्धान गरेको छ । ठक्कर दिने गाडी र त्यसका चालक सिन्धुपाल्चोक घर भइ हाल मध्यपुर थिमि नपा ७ नगदेश बस्ने २८ वर्षीय बेलबहादुर तामालाई नियन्त्रणमा लिएको छ । घटनाबारे थप अनुसन्धान भइरहेको भक्तपुर प्रहरीले जनाएको छ ।
प्रतिक्रिया दिनुहोस !
