आफू अनुकूल ठेक्का दिने प्रमुखसहित ७ जनाविरुद्ध मुद्दा
मंसिर १६, २०७६ सोमबार १५:१२:०
काठमाडौं : सडक डिभिजन कार्यालय जनकपुरका तत्कालीन कार्यालय प्रमुख सीडीई दिनेश अर्यालसमेत ७ जनाविरुद्ध मुद्दा दायर गरिएको छ । अर्याल र लेखा प्रमुख जिवनाथ पोख्रेलसमेतले ठेक्काको बोलपत्र सच्याएर केरमेट गरी आफू अनुकूल ठेकेदार कम्पनीलाई ठेक्का दिएको खुलेको छ ।
अर्याल, लेखा अधिकृत पोख्रेल, इन्जिनियर राजकुमार यादव र इन्जिनियर सन्जिवकुमार साहसमेतले ठेक्काको बोलपत्र मुल्यांकन समितिमा रही भैरव कन्स्ट्रक्सन कम्पनी प्रालि नयाँबजार काठमाडौंले पेश गरेको बोलपत्रमा दररेट अंक र अक्षरमा सच्याएको पाइएको अख्तियारले जनाएको छ ।
उनीहरुले १९ लाख ५० हजार सम्झौता गरी भैरव कन्स्ट्रक्सन कम्पनी प्रालिका संचालक सुरेशलाल श्रेष्ठ र गोपाल श्रेठ तथा भैरव कन्स्ट्रक्सन कम्पनी प्रालिका अख्तियारनामा प्राप्त मोहनप्रसाद यादवसँग मिलेमतो गरी सरकारी कागजात गैरकानूनी रूपमा सच्याई आफू र बोलपत्रदातालाई गैरकानुनी लाभ पुर्याएको अख्तियारको दाबी छ ।
यसरी आफूलाई गैरकानुनी लाभ लिई सरकारलाई हानी-नोक्सानी पुर्याइ सार्वजनिक सम्पत्ति दुरुपयोग गरेको भन्दै उनीहरुविरुद्ध अख्तियारले मुद्दा हालेको हो । जनकपुरका सीडीई अर्याल, लेखा अधिकृत पोखरेल, इन्जिनियरद्वय यादव र साहसहित सातै जनाविरुद्ध १९ लाख ५० हजार विगो कायम गर्दै भ्रष्टाचार निवारण ऐन मागदावी गरिएको छ ।
प्रतिक्रिया दिनुहोस !
