सिरहा : गत शनिबार सिरहाको लक्ष्मीपुर पतारी गाउँपालिका ४ स्थित इलाका प्रहरी कार्यालय महेशपुर पतारबाट ताल्चा तोडेर भागेका आठ थुनुवामध्ये चार जना पक्राउ परेका छन् । उनीहरुलाई प्रहरी जिल्ला विभिन्न स्थानबाट लुकिछिपी बसिरहेको अवस्थामा पक्राउ गरेका छन् । भागेका तीन जनालाई मंगलबार राति पक्राउ गरीएको हो । एकजना तत्कालै पक्राउ परेका थिए ।
शनिबार विवाहपञ्चमी र उपनिर्वाचनका लागि प्रहरी चारैतिर खटिएका थिए । त्यही मौका छोपी साँझको खाना खाने बेलामा थुनुवा कक्षको पछाडी पट्टिको ताल्चा प्रेसर कुकुरको डण्डीले तोडेर ८ जना पुरुष थुनुवाहरु फरार भएका थिए ।
फरारमध्ये नरहा गाउँपालिका –१ तिलाठीका २३ वर्षीय नविन यादव, गोलबजार नगरपालिका ६ का २१ वर्षीय गणेश कुमार साह, सखुवान्कारकट्टी गाउँपालिका भोर गाउँका २१ वर्षीय रणधीर यादवसहित तीन जना मंगलबार राति पक्राउ परेका हुन् । हिरासतबाट भाग्ने योजनाकार भनिएका नविन ४५ दिनअघि ८९ बोतल डाइलक्स डिसी (लागूऔषध) सहित पक्राउ परी लागूऔषध मुद्दामा प्रहरी हिरासतमा थिए ।
अर्का योजनाकार गणेश कुमार साह पनि ८९ बोतल डाइलेक्स डिसीसहित पक्राउ परी लागूऔषध मुद्दामा हिरासतमा थिए । रणधीर ४६ बोतल डाइलेक्स डिसी सहित पक्राउ परी लागूऔषध मुद्दा हिरासतमा थिए ।
शनिबारै पक्राउ परेका मेरंगका रोशन खडका पनि लागुऔषध ट्याबलेट सहित पक्राउ परी लागुऔषध मुद्दामा हिरासतमा थिए । उनीहरुलाई सिरहाको विभिन्न स्थानमा लुकिछिपी बसिरहेको अवस्थामा पक्राउ गरिएको सिरहा प्रहरी प्रमुख एसपी उमाप्रसाद चतुर्वेदीले बताए ।
थुनुवाहरुले १५ दिनअघि नै भाग्ने योजना बनाएको प्रहरीको प्रारम्भिक अनुसन्धानबाट खुलेको छ । हिरासतबाट ८ जनासँगै भागेपनि बाहिर सबै एक्लाएक्लै लुकेका थिए । फरारमध्ये योजनाकारसहित चार जना पक्राउ परिसकेका छन् एसपी चतुर्वेदीले भने,‘बाँकीका फरार पनि चाँडै पक्राउ पर्छन् ।’ फरार अन्यलाई पक्राउ गर्न सुरक्षाकर्मी परिचालन गरिएको उनले बताए ।
प्रतिक्रिया दिनुहोस !
