प्रदेश ३ : नाम र राजधानीको प्रस्ताव शनिबार प्रदेशसभामा दर्ता हुने
पुष २५, २०७६ शुक्रबार २०:८:०
हेटौंडा : शनिबार प्रदेश ३ को स्थायी राजधानी र नामको प्रस्ताव प्रदेशसभामा दर्ता हुने भएको छ। शनिबार बिहान ९ देखि ११ बजेसम्म प्रदशको स्थायी राजधानी र नामको प्रस्ताव दर्ता गर्न प्रदेशसभा सचिवालयले समय तोकेको हो।
शुक्रबार प्रदेशसभा बैठकमा सभामुख सानुकुमार श्रेष्ठले प्रदेशको स्थायी राजधानी तोक्ने सम्बन्धी कार्यविधि र प्रदेशको नामाकरण सम्बन्धी कार्यविधिको अनुसूची १ बमोजिमको ढाँचामा प्रदेशको नामाकरण सम्बन्धी प्रस्ताव दर्ता गर्न समय प्रदान गरेको हो।
शनिबारै दर्ता भएको स्थायी राजधानी र नामको प्रस्तावमाथि छलफल हुने सभामुख सानुकुमार श्रेष्ठले बताए। बैठकको अन्त्यमा सभामुखले प्रदेशको स्थायी राजधानी र नाम टुङ्गो लगाउन मतदानको मिति र समय घोषणा गर्ने प्रदेशसभा सचिवालयले जनाएको छ। आइतबार स्थायी राजधानी र नाम टुङ्गो लगाउन मतदान गर्ने प्रदेशसभा सचिवालयको तयारी छ।
प्रस्ताव निर्णयार्थ पेश भएपछि प्रदेशसभा सदस्यहरुले बर्णानुक्रम अनुसार हुन्छ र हुँदैन भन्ने दुई लाइनमा दस्तखत सहितको मत बिभाजनपछि मत परिणाम घोषणा हुने सभामुख श्रेष्ठले बताए। राजधानी टुङ्गो लागेपछि सोही बिधिद्वारा नाम टुङ्गो लगाइने उनले जानकारी दिए।
प्रतिक्रिया दिनुहोस !
