प्रदेश ३ को राजधानी हेटौंडा बनाउन कांग्रेसले ह्वीप जारी गर्दै
पुष २५, २०७६ शुक्रबार २०:५४:०
हेटौंडा : प्रदेशको स्थायी राजधानी र नाम टुङ्गो लगाउन नेपाली कांग्रेस ३ नम्बर प्रदेश संसदीय दलले ह्वीप जारी गर्ने निर्णय गरेको छ ।
शुक्रबार साँझ हेटौंडामा बसेको दलको बैठकले स्थायी राजधानी हेटौंडा र नाम बागमती राख्ने र प्रदेशसभाबाट पारित गर्न ह्वीप लगाउने निर्णय गरेको संसदीय दलका नेता ईन्द्र बानियाँले बताए ।
‘हामीले हेटौंडा प्रदेशको राजधानी र नाम बागमती बनाउने सर्वसम्मत निर्णय गरेका छौँ, निर्णय प्रक्रियाको क्रममा प्रदेशसभामा हामी मतदान गर्दा हाम्रा सदस्यहरुलाई ह्वीप लगाउँछौँ’, उनले भने । नेपाली कांग्रेसको ३ नम्बर प्रदेशसभामा २२ जना प्रदेशसभा सदस्य छन् ।
मुख्मन्त्री निवासमा सर्वदलीय बैठक सुरु
भोलि शनिबार प्रदेश ३ को नाम र राजधानीबारे एउटै प्रस्ताव लैजान मुख्यमन्त्री डोरमणि पौडेलको सरकारी निवासमा छलफल सुरु भएको छ ।
बैठकमा नेकपा प्रदेश संसदीय दलका नेता तथा मुख्यमन्त्री पौडेल, प्रमुख प्रतिपक्ष दल नेपाली कांग्रेस प्रदेश ३ संसदीय दलका नेता ईन्द्र बानियाँ, नेकपा नेता शालिकराम जम्कट्टेल, दीपक निरौला, नेमकिपाका सुरेन्द्रराज गोसाँई, विवेकशील साझाका रमेश पौडेल, राप्रपाकी रिता माझी, राप्रपा संयुक्तकी रिना गुरुङ सहभागी छन् ।
प्रतिक्रिया दिनुहोस !
