हेटौंडा : ३ नम्बर प्रदेशको नाम र स्थायी राजधानीका लागि पस्ताव दर्ता भएको छ । शनिबार प्रदेशको नामका लागि एक र प्रदेश राजधानीका लागि दुई प्रस्ताव दर्ता भएका हुन् । शनिबार बिहान ९ देखि ११ बजेसम्म प्रदशको स्थायी राजधानी र नामको प्रस्ताव दर्ता गर्न प्रदेशसभा सचिवालयले समय तोकेकोे थियो।
प्रदेशको नाम वागमती राख्नेमा सबै दलका सांसद सहमत भएका छन् । प्रदेश ३ को नाम वाग्मती राखियोस भनी नेपाली कांग्रेस ३ नम्बर प्रदेश संसदीय दलका नेता इन्द्रबहादुर बाँनियाले गरेको प्रस्तावका समर्थकमा नेकपा संसदीय दलका प्रमुख सचेतक रामेश्वर फुयाँल, राप्रपाकी रिता माझी, राप्रपा संयुक्तकी रिना गुरुङ, विवेकशील साझाका रमेश पौडेल र शोभा शाक्य रहेका छन् । उक्त नाममा नेमकिपाको पनि समर्थन गरेको छ।
त्यसैगरी प्रदेश राजधानीका लागि भने दुईवटा प्रस्ताव दर्ता भएका छन् । मुख्यमन्त्री डोरमणि पौडेलले हेटौंडा राजधानी बनाइयोस भनी प्रस्ताव दर्ता गरेका छन् भने विवेकशील साझाका सांसद रमेश पौडेलले धुलिखेल राजधानी बनाउन प्रस्ताव दर्ता गरेका छन्।
डोरमणिको प्रस्तावमा इन्द्रबहादुर बाँनिया, रिता माझी र रिना गुरुङको समर्थन छ भने रमेशको प्रस्तावमा सांसद शोभा शाक्य र विराजभक्त महर्जन समर्थक रहेका छन् ।
बलियो दुईतिहाइ रहेको सत्तारुढ नेकपासहित मुख्य दल राजधानी हेटौंडा र नाम बागमती बनाउन एकमत भएका छन्। राजधानीलाई लिएर नेकपाका प्रदेश सांसदहरूमा तीव्र मतभेद थियो।
पार्टी केन्द्रको लबिङ र तीब्र दबावपछि आइतबार बसेको नेकपा प्रदेश ३ संसदीय दलको बैठकले हेटौंडालाई प्रदेश राजधानी बनाउन सहमति जुटाएको हो।
प्रतिक्रिया दिनुहोस !
