दाङ : राष्ट्रियसभा सदस्यको निर्वाचनका लागि मतदान सरु भएको छ । बिहान १० बजेदेखि प्रदेश ५ मा मतदान सुरु भएको हो । मतदान केन्द्र दाङको घोराहीमा प्रदेशका मुख्य मन्त्री शंकर पोख्रेलले पहिलो मत खसाल्दै मतदानको सुरुवात गरेका हुन्।
निर्वाचनको लागि मतदान गर्न ५ प्रदेशका १२ वटै जिल्लाका मतदाता आइसकेका छन् । घोराहीको कर्मचारी मिलन केन्द्रमा दुईवटा मतदान केन्द्रमार्फत मतदान भइरहेको छ ।
निर्वाचन अधिकृत रितेन्द्र थापाका अनुसार 'क' मतदान केन्द्रमा प्रदेशसभा सदस्यले मतदान गर्नेछन् भने 'ख' मतदान केन्द्रमा स्थानीय तहका प्रमुख र उपप्रमुखले मतदान गर्नेछन् । 'क' मतदान केन्द्रमा प्रदेश ५ का ८७ जना प्रदेश सभा सदस्य मतदाता रहेका छन् भने 'ख' मतदान केन्द्रमा प्रदेश भरका स्थानीय तहका प्रमुख र उपप्रमुख गरी २१८ जना मतदाता रहेका छन्।
निर्वाचनमा १६ जना कर्मचारी खटिएका छन । रिक्त रहेको १९ जना सदस्य मध्ये १८ पदका लागि हुन लागेको निर्वाचनमा राष्ट्रियसभा निर्वाचनका लागि प्रदेश ५ मा तीन जना निर्वाचित हुने छन्। यहाँ तीन सय ५ जना मतदाता रहेको निर्वाचन कार्यालय दाङले जनाएको छ । ८७ जना प्रदेशसभा सदस्य र १२ जिल्लाका एक सय ९ स्थानीय तहका प्रमुख र उपप्रमुख गरी दुई सय १८ जना रहेका छन् ।
निर्वाचनमा ९ जना उमेदवारको प्रतिस्पर्धा रहेको छ । राष्ट्रियसभा सदस्यका लागि प्रदेश ५ मा सत्तारुढ नेपाल कम्युनिस्ट पार्टी 'नेकपा' र नेपाली कांग्रेस पार्टीबाट तीन-तीन जना, समाजवादी पार्टीबाट दुईजना र राष्ट्रिय जनमोर्चा पार्टीबाट एक जनाको प्रतिस्पर्धा छ।
प्रदेश ५ मा नेकपाबाट अपांग सदस्यमा दाङका जगप्रसाद शर्मा, कपिलवस्तुबाट महिला सदस्यमा विमला घिमिरे र अन्यबाट रुपन्देहीका गोपाल भट्टराई चुनावी मैदानमा छन् ।
त्यसैगरी राष्ट्रियसभा सदस्यका लागि नेपाली कांग्रेसबाट दाङकी महिला सदस्यमा गिरिजादेवी न्यौपाने, बाँकेका अल्पसंख्यक सदस्यमा मेहराज अहमद हलुवाई र अन्यबाट अर्घाखाँचीका बालकृष्ण पाण्ड छन् । समाजवादी पार्टीबाट अल्पसंख्यक सदस्यमा बाँकेवाट सुनिल सिंघल र अन्यबाट बर्दियावाट कृष्णप्रसाद यादव निर्वाचनमा छन् । त्यसैगरी राष्ट्रिय जनमोर्चा पार्टीबाट कपिलवस्तुवाट शिवप्रसाद पौडेल पनि चुनावी मैदानमा छन् ।
प्रदेश नम्बर ५ बाट राष्ट्रियसभा सदस्य रहेका रोल्पाका राजकुमार कुँवर र मिना बुढा तथा रुपन्देहीका दुर्गाप्रसाद उपाध्यायको २ वर्षे कार्यकाल सकिएपछि निर्वाचन हुन लागेको हो ।
कुँवर र बुढा नेकपा तथा उपाध्यक्ष कांग्रेसको तर्फबाट निर्वाचित थिए ।नेकपा, नेपाली कांग्रेस, जनमोर्चा, रापजा, संघीय समाजवादी पार्टीले राष्ट्रिय सभाका लागि उम्मेदवार तयार पारेका छन । नेकपाको जित भने सुनिश्चित रहेको छ । ४ बजेसम्म मतदानको समय तोकिएको छ ।
प्रतिक्रिया दिनुहोस !
