बेंसीसहर : लमजुङको सुन्दरबजार नगरपालिका ७, पाउँदीमा बन्चरो प्रहार गरी एक वृद्धाको हत्या भएको छ । स्थानीय ६० वर्षीया सीता भुजेल पोख्रेलको हत्या भएको प्रहरीले जनाएको छ । डुम्रे-बेंसीसहर सडकखण्डको पाउँदीबजारमा बस्ने पोख्रेल एकल महिला हुन् ।
घाँटीमा बन्चरो रहेको अवस्थामा शव भेटिएको थियो । बन्चरो मृतकको घाँटीम गडेको र बिँड फुक्लिएको अवस्थामा खाटमुनि फेला परेको प्रहरी अनुसन्धानबाट खुलेको छ । घटनास्थलमा रगत छरपस्ट भएको र शव वरपर मकै छरिएको भेटिएको स्थानीयले बताएका छन् ।
१८ वर्षदेखि पतिसँग छुट्टिएर बस्दै आएकी सीताका सन्तान छैनन् । मस्र्याङ्दी गाउँपालिका-९, सिम्पानी माइती भएकी उनी बाख्रा व्यवसाय गर्थिन् । भाडामा बसेर बाख्रा व्यवसाय गरी ८ वर्षअघि उनले आफ्नै घर बनाएकी थिइन् । उनकोमा अहिले पनि १२ वटा बाख्रा रहेका छन् ।
लुटपाटपछि हत्या आशंका
उनले कानमा लगाएको गहाना र केही नगदसमेत हराएकाले लुटपाटपछि हत्या भएको हुनसक्ने स्थानीय बताउँछन् । इलाका प्रहरी कार्यालय भोटेओडारका प्रहरी निरीक्षक लोकेन्द्र अधिकारीकाअनुसार सीताले लगाएको अढाई तोला सुनका ठुला ठुला रिङ कानबाट चुँडालेको देखिएको छ । उनले केहीदिन अघि खसी बेचेको २२ हजार रुपियाँ पनि साथमा नभेटिएको प्रहरीले जनाएको छ ।
अनुसन्धान हुँदै
गण्डकी प्रदेश प्रहरी कार्यालयबाट २ वटा कुकुर झिकाएर घटनाको अनुसन्धान गरिएको थियो । हालसम्म शंकास्पद व्यक्तिलाई सोधपुछबाहेक प्रहरीले कसैलाई पक्राउ गरेको छैन् । अनुसन्धानपछि कुकुर फिर्ता पठाइएको प्रहरी प्रमुख डिएसपी रवीन्द्रमान गुरुङले बताए । घटना आइतबार रातिको भए पनि वृद्धा एक्लै बसेको र वरपर कोही नहुँदा ढिला गरी प्रहरीले जानकारी पाएको थियो । ‘घटना कर्तव्य ज्यान प्रकृतिको छ । हामीले अनुसन्धान गरिरहेका छौं,' गुरुङले भने । मृतकको शव पोस्टमार्टमको लागि लमजुङ जिल्ला सामुदायिक अस्पतालमा ल्याइएको छ।
प्रतिक्रिया दिनुहोस !
