जोमसोम : धार्मिक पर्यटकीय गन्तव्य मुस्ताङको मुक्तिक्षेत्रमा शनिबार सुरक्षाकर्मीले सरसफाई तथा हिउँ पन्छ्याउने काम गरेका छन् । जिल्ला प्रशासन कार्यालय मुस्ताङको समन्वयमा शैनिक उच्चशिखर शिक्षालयका शैनिक जवान, सशस्त्र प्रहरी , नेपाल प्रहरी, अन्नपूर्ण संरक्षणक्षेत्र आयोजना एक्याप पर्यटक चेकपोष्ट र स्थानीयबासी लगायतले मुक्तिनाथको पहिलोद्वारदेखि मन्दिर परिसरको बाटोमा थुप्रिएको हिउँ पन्छ्याएका हुन् ।
जारी सिजनमा लगातार ३ पटक परेको हिमपातले मुक्तिनाथ रानीपौवा बजारदेखि मुक्तिनाथद्वारसम्मको करिव २ किलोमिटर पैदल बाटोमा २ फिट हिउँ जमेपछि तिर्थालुलाई मन्दिर पुग्न कठिनाइ परेको थियो । ३ वटै सुरक्षाकर्मीका करिव ६० जवान, एक्याप र स्थानीयबासी गरी ८० जना बढीको समूहले बाटोमा जमेको हिउँ पन्छ्याउने कार्य गरेको मुस्ताङका निमित्त सहायक प्रमुख जिल्ला अधिकारी घनश्याम गौतमले जानकारी दिए । यस्तै, सुरक्षाकर्मीले पैदलमार्गका साथै मन्दिर परिसरको हिउँ पन्छ्याएको सहायक प्रजिअ गौतमले बताए ।
यसअघि रानीपौवा बजारदेखि मुक्तिनाथसम्मको दुरीमा बाक्लो हिउँ जमेकाले मुक्तिनाथ दर्शन गर्ने तिर्थालुलाई असहज हुँदै आएको थियो । बजारबाट मन्दिर जाने जीर्ण उकालो बाटो त्यसमाथि हिउँको चाङले स्वदेशी तीर्थालुभन्दा भारतीय तीर्थालुलाई बढी समस्या पर्दै आइरहेको थियो । बाँक्लो हिउँमा पैदल यात्रा गर्दा तीर्थालुलाई लडेर चोटपटक लाग्ने गर्थ्यो । हिउँले भरिएको पैदल मार्गमा स्थानीयले तीर्थालुलाई बोकर वा स्टेचरमा राखेर लाने र ल्याउने गरेका थिए । सुरक्षाकर्मीले बाटोको हिउँ पन्छ्याएपछि तीर्थालुलाई अब आउजाउमा केही सजिलो भएको प्रहरी नायव उपरीक्षक तुलबहादुर कार्कीले उल्लेख गरे ।
यस्तै, वारागुङ मुक्तिक्षेत्र गाउँपालिकाले कागबेनीदेखि मुक्तिनाथ बसपार्कसम्मको १२ किलोमिटर कालोपत्रे सडकको हिउँ डोजर लगाएर पन्छ्याएको छ। पालिकाले सवारी साधनमार्फत मुक्तिनाथ आउजाउ गर्ने सवारीको सहजताका लागि डोजर खर्च व्यवहोर्ने गरी ४ दिन लगाएर हिउँ पन्छ्याएको अध्यक्ष फेञ्चोक छेप्तेन गुरुङले जानकारी दिए । सडकको हिउँ पन्छ्याएपछि अहिले निर्वाध मुक्तिनाथ आउजाउ गर्न सजिलो भएको अध्यक्ष गुरुङले बताए।
प्रतिक्रिया दिनुहोस !
