जोमसोम : मुस्ताङको मुक्तिक्षेत्रमा सोमबार तेश्रो राष्ट्रिय स्की च्याम्पियनसीप सम्पन्न भयो । हिउँ पर्यटक प्रर्वद्धन, स्की खेलको विकास तथा सरकारले घोषणा गरेको भिजिट नेपाल २०२० वर्ष सफल पार्न स्की च्याम्पियनसीप गरिएको हो ।
नेपाल स्की संघले आयोजना गरेको स्की च्याम्पियनसीपमा ४ जिल्लाका ३३ खेलाडी सहभागी भएका थिए । स्कीका ३ विधालाई मुख्य आधार बनाएर खेलाइएको च्याम्पियनसीपमा हिउँमा खेल्ने खेलाडीलाई एकआपसमा प्रतिस्पर्धा गराइएको थियो ।
च्याम्पियनसीपको क्रस कन्टी विधातर्फ महिला खेलाडी सुजता नामपुर प्रथम भइन् भने ईशा तामाङ दोश्रो भइन् । यसका अतिरिक्त क्रस कन्टीमा थुप्तेन लामा र चिनार तामाङ तेश्रो र चौथो भए । यस्तै स्नो बोडिङ स्कीतर्फ विशाल तामाङ प्रथम, नविन तामाङ दोश्रो र छिरिङ तामाङ तेश्रो भए ।
अल्पाइन स्कीतर्फ सिनियर र जुनियर गरी २ समुहमा पुरुष र महिलाबीच अलग–अलग प्रतिस्पर्धा गराइएको थियो । स्की कोअर्डिनेटर अर्जुन महर्जनका अनुसार अप्लाइन स्कीको सिनियर पुरुषतर्फ साहसराम श्रेष्ठ प्रथम, सुकदेव थापा दोस्रो र प्रगुन महर्जन तेश्रो भए । महिला सिनियर अल्पाइनतर्फ गौरीमाया तामाङ प्रथम, संगिता लामा दोश्रो र लक्ष्मी राई तेश्रो भइन् । अप्लाइन स्कीको जुनियर पुरुषतर्फ सागर तमाङ प्रथम, उमङ्ग रञ्जित दोश्रो र किरण रञ्जित तेश्रो भए । महिलातर्फ लाक्पा डोल्मा शेर्पा प्रथम, आरसी महर्जन दोश्रो र उजला मुनिकार तेश्रो भइन् ।
च्याम्पियनसीपका लागि मुक्तिक्षेत्रको सेताम्मे हिउँमा २ दिनसम्म खेलाडीलाई प्रशिक्षण गराइएको स्की संघका सचिव वशन्तराज कार्कीले बताए । उनका अनुसार स्की संघमा आवद्ध स्की खेलाडीलाई बिहान ८ बजेदेखि साझ ४ बजेसम्म अभ्यास गराइ च्याम्पियनसीपमा सहभागी गराइएको सचिव कार्कीले जानकारी दिए । स्की अभ्यासका लागि क्याप्टेन बुद्धिप्रसाद गुरुङ, रामबहादुर गुरुङ, शेरबहादुर गुरुङ र क्याप्टेन धुब्र सेन खटिएका थिए । स्की प्रशिक्षण लिनेमा केही ओलम्पिक खेलमा भाग लिएका खेलाडी छन् ।
सोमबार स्कीका ३ वटै विधाका च्याम्पियन तथा बिजेता टोलीलाई ओलम्पिक कमिटी तथा स्की संघका अध्यक्ष एवं संघिय सांसद जीवनराम श्रेष्ठ, राखेपका उपाध्यक्ष पिताम्बर तिम्सिना, प्रदेश सांसद महेन्द्रबहादुर थकाली लगायतले संयुक्त रुपमा मेडल तथा प्रमाणपत्रले पुरस्कृत गरे । स्की च्याम्पियनसीपको समापन समारोहमा बोल्दै स्की संघ अध्यक्ष एवं सांसद जीवनराम श्रेष्ठले नेपाली खेलाडीलाई माउन्टेन अनुकुल खेलको तालिम संञ्चालन गरी अन्तरराष्ट्रिय प्रतियोगितामा सहभागी गराउने संघको मुख्य उद्देश्य रहेको बताए ।
राखेपका उपाध्यक्ष पिताम्बर तिमिल्सिनाले बेमौसमे सिजनमा हिउँसंग जोडेर खेलाइने खेलको विकासले नेपालको पर्यटनक्षेत्रलाई योगदान पुग्ने बताए । कार्यक्रममा गण्डकी प्रदेशका सांसद महेन्द्रबहादुर थकाली, स्की संघका महासचिव विजय श्रेष्ठ, वारागुङ मुक्तिक्षेत्रका अध्यक्ष फेञ्चोक छेप्तेन गुरुङ, प्रजिअ वेदप्रसाद अर्याल र संघका उपाध्यक्ष माधव अर्याल लगायतले नेपालमा स्की खेलको संम्भावना, पर्यटन विकास र यसको चुनौतिका बिषयमा आ–आफ्ना धारण राखे।
नेपाल स्की संघले मुस्ताङमा सम्पन्न गरेको स्की च्याम्पियन २०७६ संगै ३ वटा संस्करण पुरा गरेको छ । संघले पहिलो स्की रसुवाको क्यान्जेन भ्यालीमा गरेको थियो भने दोश्रो र तेश्रो मुस्ताङमा भएको हो । संघले मुक्तिक्षेत्रको रानीपौवा बजारको पाखोमा स्की खेलाएको थियो ।
हिउँदयामा स्की प्रमोसन गर्न सके बजारक्षेत्रका युवा स्की खेल्न उत्प्रेरित हुने संघको भनाइ छ । नेपालमा अरु खेल जस्तै स्कीको नियमित अभ्यास गर्न सके अन्तरराष्ट्रिय इईभेन्टमा नेपालको संम्भावना बलियो हुने उपाध्यक्ष वशन्तराज कार्कीले दावी गरे । संघले हिउँसंगै लुकामारी खेलिने यस्ता इभेन्टलाई राज्यले सम्वोधन गर्नुपर्ने जनाएको छ । मुस्ताङमा यसपटक भएको स्की च्याम्पियनसीपमा स्थानीय युवायुवतीले समेत स्कीको अनुभव लिएका छन् ।
प्रतिक्रिया दिनुहोस !
