ललितपुर : गएसाता पुल्चोकको निदान अस्पतालमा अघिल्लो साता कोरोना भाइरसका एक जना शंकास्पद बिरामी देखा परे । उनलाई थप उपचारका लागि तत्काल राष्ट्रिय जनस्वास्थ्य कार्यालय टेकु पुर्याइएको थियो । ट्रेकिङ गाइड ती युवक यतिबेला स्वस्थ तन्दुरुस्त बनिसकेका छन् । उनलाई कोरोना भाइरस नलागेको पुष्टि भएको डा. सागर शाक्यले बताए । उनी काठमाडौं उपत्यकाका तीन जिल्लालाई मुख्य कार्यथलो बनाएर विश्व स्वास्थ्य संगठन (डब्लुएचओ)का लागि काम गर्छन् ।
स्वास्थ्य कार्यालय ललितपुरले आइतबार समुदाय र विद्यालय तहसम्म जनचेतना फैलाउन कार्यक्रम गरेको थियो । ललितपुरका ६ वटै नगर÷गाउँपालिकामा नर्स, डाक्टर तथा स्वास्थ्य प्रमुख सहभागी कार्यक्रमको निष्कर्ष जनमानसमा त्रास फैलाउनुभन्दा कोरोनाबारे जानकारी र सूचना दिनुपर्ने थियो । तर पूर्वसावधानीका लागि कसरी समुदाय र स्कुलसम्म पुग्न सकिन्छ भन्नेमा केन्द्रित भएको थियो ।
स्वास्थ्य कार्यालय ललितपुरका प्रमुख खगेश्वर गेलालले कोरोनाको संक्रमणबाट जोगिन जनचेतना फैलाउनु पर्ने बताए । समुदाय र स्कुलमा कोरोनाविरुद्ध पूर्वतयारी गर्न सबै स्थानीय तहलाई पहल गर्न सुझाए । उनले भने, ‘जनमानसलाई सचेत बनाऔं ।’ उनले यथार्थभन्दा त्रास फैलाइसकेका छौं कि भनेर सचेत हुन आग्रह गरे । बालबालिका, वृद्धवृद्धा, चिनी रोग, श्वासप्रश्वासका समस्या भएका र उच्च रक्तचापका बिरामीले भीडभाडभन्दा एक मिटर परै बस्न र साबुनपानीले हात धुन, हाछ्युँ गर्दा हातको प्रयोग नगर्न सिकाउन सुझाए ।
गेलालका अनुसार कोरोना भाइरस दादुराभन्दा कम सर्न सक्छ । कोरोना दुई प्रतिशत जति मात्र सर्न सक्छ । हालसम्मका १५ प्रतिशत बिरामीमा मात्र कडा खालका समस्या देखिएको उनले बताए । ‘सयमा दुई प्रतिशतभन्दा कम मृत्युदर हुन्छ ।’ कोरोना संक्रमितको मिर्गौलाले काम गर्न छाडेपछि मृत्यु हुने उनले बताए ।
तर ३८ डिग्री सेल्सियसभन्दा बढी ज्वरो आए, सास फेर्न कठिन भए, खोकी लागे तुरुन्त अस्पताल जानुपर्ने बताए । रुघाखोकी लागेको तर हालसालै चीन भ्रमण नगरेका बिरामीलाई सामान्य रुपमा हेरिने पनि उनले प्रष्ट्याए ।
काठमाडौं उपत्यकाका ५ अस्पताललाई कोरोना संक्रमितको उपचारका लागि तयारी अवस्थामा राखिएकोे छ । पाटन अस्पतालमा संक्रमितका लागि आइसोलेसन वार्ड तयार गरिएको छ । अस्पतालका इमर्जेन्सी विभाग प्रमुख डा.सिताराम श्रेष्ठका अनुसार अस्पतालमा ८ बेडसहित छुट्टै कक्ष तयार छ । अस्पतालमा दुई ल्याब छन् । त्यसैमा सामान्य परीक्षणसमेत हुनेछ । तर नेपालमा टेकु अस्पतालमा मात्रै कोरोना परीक्षण गर्न सकिने उनले जानकारी दिए । बिरामी तथा डाक्टरले लगाउने पोसाक पनि तयार राखिएको छ ।
प्रतिक्रिया दिनुहोस !
