जोमसोम : हिमाली जिल्ला मुस्ताङको घरपझोङ गाउँपालिका ४ जोमसोममा शनिबार राती एक घरमा आगलागी हुँदा करिब ७० लाख बरामरको धनमाल क्षति भएको जिल्ला प्रहरी कार्यालय मुस्ताङले जनाएको छ ।
स्थानीय मनोज गोतामेको घर भाडामा लिइ फेन्सी पसल संञ्चालन गरेकी स्थानीय सोममाया ल्वागुनको पसलमा शनिबार राती १० बजे आगलागी भएको प्रहरी निरीक्षक बिनोद सुवेदीले जानकारी दिए ।
फेन्सी पसलमा विद्युत सट भई आगलागी भएको हुनसक्ने प्रहरी निरीक्षक सुवेदीको अनुमान छ । आगोलागीबाट भुँइतलाको फेन्सी पसल पूर्णरुपमा जलेर नष्ट भएको छ भने घर भित्रका फर्निचर तथा लत्ताकपडा जलेर नष्ट भएको प्रहरी निरीक्षक सुवेदीले अन्नपूर्णलाई बताए ।
यस्तै, ढुंगा,माटो र काठले बनेको २ तले ४ कोठा भएको कच्ची घरमा क्षती भएको हो । उद्दार टोली समयमै उपस्थित भएकाले थप मानवीय क्षति हुन भने नपाएको प्रहरीले जनाएको छ ।
यसअघि आगलागी भएको खबर पाएपछि स्थानीयबासी तत्काल आगो निभाउन घटनास्थलमा पुगेको नेपाल विद्यार्थी संघ मुस्ताङका अध्यक्ष असिम शेरचनले जानकारी दिए । नेपाली सेना ,सशस्त्र प्रहरी ,नेपाल प्रहरी र स्थानीयीबासीको सहयोगमा ३ घण्टापछि आगो नियन्त्रणमा आएको उनले बताए ।
रातीको समय खाना खाइ माथिल्लो तलामा सुत्ने क्रम भुइँतलाबाट आगलागी भएको पीडित सोममाया ल्वागुनले प्रहरी समक्ष बताएकी छिन् ।
प्रतिक्रिया दिनुहोस !
