काठमाडौँ : अस्थायी ट्राफिक प्रहरी पोष्ट रामनगर, बुटवलका प्रहरी सहायक निरीक्षक सूर्यबहादुर अधिकारीविरुद्ध घुस मुद्दा दायर गरिएको छ ।
प्रहरी चौकी खिदिम, अर्घाखाँची दरबन्दी भइ हाल रामनगरमा कार्यरत अधिकारीले टिपर चालकलाई डर त्रास देखाइ पटक पटक घुस लिँदैआएका थिए । उनलाई अख्तियारले सेवाग्राहीबाट ५ हजार घुस लिइसकेको अवस्थामा नियन्त्रणमा लिएको थियो ।
अधिकारीले सेवाग्राहीको टिप्पर संचालनमा सहजीकरण गरिदिएबापत मासिकरुपमा ५ हजारको दरले रकम असुल गर्ने गरेको अख्तियारको अनुसन्धानबाट खुलेको छ । त्यस्तै स्थायी ट्राफिक प्रहरी पोष्ट देवदह खैरेनी, रुपन्देहीका प्रहरी जवान छविलाल पोख्रेल मासिकरुपमा ३ हजार उठाउँदैआएका थिए । उनले टिपर चालकसँग प्रति महिना ३ हजारको दरले रकम असुल्दैआएको पाइएको अख्तियारले जनाएको छ ।
अख्तियारले तीन हजार घुस लिइसकेको अवस्थामा उनलाई नियन्त्रणमा लिएको थियो । उनीहरुविरुद्ध भ्रष्टाचार निवारण ऐन बमोजिम जरिवाना र कैद सजायको मागदाबीसहित विशेष अदालत, काठमाडौंमा आरोपपत्र दायर गरिएको छ ।
प्रतिक्रिया दिनुहोस !
