जोमसोम : राष्ट्रिय गौरव आयोजना अन्तर्गत कालिगण्डकी करिडोरले निर्माण गर्दै गरेको बेनी–जोमसोम–कोरला सडकखण्डमा आउने विभिन्न प्रकार समस्यामा यात्रुको सारथी बनेका छन् इन्द्र दाइ अर्थात इन्द्रसिंह शेरचन ।
करिडोर सडकको बेनी–जोमसोम ७६ किमी निर्माणधीन सडक स्तरोन्नतिका लागि सुपरभाइजरका रूपमा खटिएका उनले प्राकृतिक प्रकोपका कारण सडकमा आइपर्ने समस्यामा हरेक यात्रुको सारथी बनेर सघाउने गरेका छन् ।
पुर्ख्यौली घर थासाङ गाउँपालिका भएका उनको म्याग्दीको अन्नपूर्ण गाउँपालिका–३ दानामा होटल छ । उनी पेशाले एक पर्यटक गाइड पनि हुन् । उनले करिडोर सडकको रेखदेखको जिम्मेवारी पनि सम्हाल्दै आइरहेका छन् ।
राष्ट्रिय गौरवको बेनी–जोमसोम सडक स्तरबृद्धिको काम २०७४ सालदेखि भएको हो । उनी सडकको काममा खटिएको पनि ३ वर्ष पुरा भइसकेको छ । सडक निर्माणको क्रममा आईपर्ने जुनसुकै विपतकालीन परिस्थितिमा उदार भावले सघाउने उनको बानी परेको छ । यात्रु उद्दार तथा दोहोरो सवारी आउजाउमा दिलो ज्यानले सघाउने इन्द्र दाइ उक्त सडकमा चल्ने सवारी चालक सबैका प्रिय पात्र बनेका छन् ।
यसपटक पनि उनले यस्तै, अर्को एक यात्रु उद्दारको उदाहरणीय कार्य गरेका छन्। गत मंगलबार बेनी–जोमसोम सडकखण्ड अन्तर्गत थासाङ गाउपालिका ४ घैकु खोला नजिक सुख्खा पहिरो गएपछि सडक अवरुद्ध बन्यो । दुईतर्फी सडक बन्द भएपछि मुस्ताङ आउजाउ गर्ने पर्यटकलाई समस्या पर्यो । अवरुद्ध सडक पैदलै हिँडेर अर्को सवारी फेर्नुपर्ने बाध्यता पर्यटकलाई आयो ।
सडकमाथिको भीर जंगल र खाल्डाखुल्डी बाटो पार गर्न पर्यटकलाई हम्मेहम्मे पर्यो । जुन बाटो छिचोल्न ४५ मिनेट समय लाग्थ्यो । निकै जोखिमयुक्त बाटोमा यात्रुका सारथी इन्द्र दाइले मुस्ताङ जाने पर्यटकहरुलाई काँधमा बोकेरै गन्तव्यमा पूर्याए । उनले यात्रुलाई बोकेर उद्दार मात्र गरेनन् यात्रुको सामान बोक्ने र हात समातेर बाटो कटाइदिने लगायतका काम गरे ।
उनी आफूले यसप्रकारको सामाजिक उत्तरदायित्वको सहयोगी काम धेरै पटक गरेको बताउँछन्। उनले भने, ‘समस्या आइपर्दा सहयोग गर्नु मानवीय धर्म हो । यस्तो काम गर्दा कनै आशा र अपेक्षा राख्दिनँ । निस्वार्थ भावले सेवा गर्दै आएको छु ।’ उनले सडक निर्माणको क्रममा यात्रुलाई आईपर्ने समस्यामा सहयोग गर्ने गरेको बताए । गत वर्ष म्याग्दीको महभीरमा सडक अवरुद्ध हुँदा धेरै पर्यटकलाई बोकेर सहयोग गरेका थिए ।
प्रतिक्रिया दिनुहोस !
