प्रहरी अधिकृतको नक्कली प्रमाणपत्र

काठमाडौं : नेपाल प्रहरीका प्रहरी नायब निरीक्षक उत्तम कार्कीको शैक्षिक योग्यताको नक्कली प्रमाणपत्र फेला परेको छ ।  उनले मगध विश्वविद्यालय बोधगया भारतबाट बी.कम. उत्तीर्ण गरेको प्रमाणपत्र पेश गरी बढुवा नियुक्ति लिएको र उक्त शैक्षिक प्रमाणपत्र प्रमाणीकरण विवरणबाट झुठ्ठा भन्ने पुष्टि भएको हो। 

अख्तियार दुरुपयोग अनुसन्धान आयोगले राष्ट्रसेवक ओहोदामा बहाल रहने र सो हैसियतले लाभ वा सुविधा पाउने उद्देश्यले उक्त झुठ्ठा योग्यताको प्रमाणपत्र पेश गरेको देखिएपछि सई कार्कीविरुद्ध भ्रष्टाचार निवारण ऐन बमोजिम सजायको मागदावीसहित विशेष अदालतमा मुद्दा दायर गरिएको छ ।
 

शान्ति विद्यागृह मावि लैनचौर काठमाडौंमा कार्यरत माध्यमिक शिक्षक तृतीय (शिक्षक) दिपकबाबु अर्यालविरुद्ध शैक्षिक योग्यताको नक्कली प्रमाणपत्र पेस गरी स्थायी शिक्षक सेवामा रहेको भन्दै मुद्दा दायर गरेको हो । उनले मगध विश्वविद्यालय बिहार भारतबाट बीएससी परीक्षा उत्तीर्ण गरेको झुठ्ठा नक्कली शैक्षिक योग्यताको प्रमाणपत्र पेश गरी २० वर्षदेखि जागिर खाइरहेका थिए। अख्तियारका अनुसार उनले २०५७ जेठ २५ मा मावि तृतीयको पदमा अस्थायी नियुक्ति र २०६३ भदौ २९ मा स्थायी नियुक्ति लिइ कार्यरत रही लाभसमेत लिएको देखिएकोक छ । 

सई कार्की र शिक्षक अर्यालविरुद्ध भ्रष्टाचार निवारण ऐन, बमोजिमको माग दाबीसहित विशेष अदालत, काठमाडौंमा आरोपपत्र दायर गरिएको छ ।