परासी : पश्चिम नवलपरासीको सुनवल नगरपालिकाले नगर क्षेत्रमा सञ्चालित कक्षा ८ को आधारभूत तह उत्तीर्ण परीक्षामा सहभागी परीक्षार्थीलाई नि:शुल्क मास्क वितरण गरेको छ । कोरोना भाइरसको संक्रमणबाट सुरक्षित रहन विभिन्न सचेतना मुलक कार्यक्रम सञ्चालन गर्दै आएको नगरपालिकाले आइतबारबाट सञ्चालन भएको परीक्षामा सहभागी भएका परीक्षार्थीलाई मास्क वितरण गरेको हो ।
कोरोनाबाट सुरक्षित रहन भन्दै नगरपालिकाले नगर क्षेत्रमा लाग्दै आएको हाटबजारसमेत बन्द गरेको छ । ‘परीक्षामा सहभागी हुने विद्यार्थीलाई प्रवेश गर्नुअघि स्वास्थ्य निगरानी गर्ने गरिएको छ । ज्वरो, रुघा खोकी लागेको पाइएमा छुट्टै राख्ने व्यवस्थासमेत मिलाएका छौं’, नगर प्रमुख भीमबहादुर थापाले भने ।
सामान्य रुघा खोकीबाट सुरक्षित रहन सघाउ पुग्ने भएकाले सबै परीक्षार्थीलाई मास्क वितरण गरेको उनले जानकारी दिए । हरेक दिन मास्क लगाएर मात्र परीक्षार्थीलाई सहभागी गराउने गरिएको थापाले बताए । केन्द्राध्यक्ष, निरीक्षकलगायत सबै कर्मचारीलाई पनि मास्क अनिवार्य गरेर परीक्षा लिइएको छ । अनुगमनमा जानेका लागि समेत मास्क अनिवार्य गरिएको नगर प्रमुख थापाले बताए ।
नगर क्षेत्रमा १६ संस्थागत र १६ सामुदायिक गरी कुल ३२ वटा विद्यालयमा परीक्षा भइरहेको छ । ८ केन्द्रबाट कुल १ हजार ३ सय ८८ परीक्षार्थीले परीक्षा दिइरहेका नगर शिक्षा शाखाका शाखा अधिकृत पशुपति भट्टराईले जानकारी दिए ।
प्रतिक्रिया दिनुहोस !
