जोमसोम : विश्वव्यापी महामारीको रुपमा फैलिदै गएको कोभिड-१९ कोरोना भाइरसको संक्रमण नियन्त्रण गर्ने उद्देश्यले मुस्ताङका ५ वटै स्थानीय तहले उच्चसजगता अपनाउन थालेका छन् ।
जिल्ला क्वारेन्टाइन व्यवस्थापन समितिका संयोजक सिडिओ वेदप्रकास अर्यालले कोरोना नियन्त्रण गर्न जिल्लाका ५ वटै पालिकामा क्वारेन्टाइन स्थापना गर्ने कार्य भएको जानकारी दिए । तल्लो मुस्ताङदेखि उपल्लो मुस्ताङसम्मका ५ वटै पालिका गरी करिब ६० बेडको क्वारेन्टाइन स्थापना भएको उनले बताए ।
क्वारेन्टाइन व्यवस्थापन संयोजक अर्यालका अनुसार थासाङ गाउँपालिका-४ को घासामा जनता आधारभूत विद्यालयमा १० बेड ,घरपझोङ गाउँपालिका-४ जोमसोमको जनहित माविमा २० बेड ,वारागुङ मुक्तिक्षेत्र गाउपालिकाको कागबेनी र मुक्तिनाथमा ६ बेड , लोघेकर दामोदरकुण्ड गाउपालिका चराङको युवा क्लव भवनमा ८ बेड र लोमान्थाङ गाउपालिकाको लोमान्थाङमा वडाअध्यक्षको निजी घरमा १४ बेड क्षमताको क्वारेन्टाईन स्थापना भएको हो ।
मुलुक लक डाउन भएपछि मुस्ताङका ५ वटै पालिकामा कोरोना संक्रमण त्रास बढेको छ । स्थानीयले स्वदेश तथा विदेशबाट गाउ फर्किनेलाई सिधै गाउमा आउजाउ गर्न नपाईने भन्दै पालिकाहरुले क्वारेन्टाइन स्थापनामा जोड दिएको लोघेक दामोदरकुण्ड गाउँपालिकाका अध्यक्ष लोप्साङ छोम्फेल बिष्टले जानकारी दिए ।
उनले यतिबेला कोरोना भाईरसको बिषम अवस्था आइपुरेकाले को आफ्नो र को अरुको नभनी नया अनुहारलाई क्वारेन्टाइनमा राख्न आवश्यक भएको उल्लेख गरे ।
लोमान्थाङमा स्वास्थ्य चौकीमा हेल्थ राखिएको छ भने लोघेक दामोदरकुण्डको सुर्खाङ,घमी र चराङ स्वास्थ्य चौकीमा स्वास्थ्यकर्मी सहितको आईसोलेन कक्ष राखिएको प्रमुख प्रशासकीय अधिकृत मनोहर ढुङ्गानाले जानकारी दिए । उनका अनुसार अन्य वडामा पनि स्वास्थ्य इकाई गठन भएको बताए । लोघेकरमा जिग्मे फाउन्डेसनले कोरोना नियन्त्रणका लागि पहल गरेको छ । संस्थाले अलग्गै स्वास्थ्यकर्मी र औषधि उपलब्ध गराएको छ ।
लोमान्थाङ ,लोघेकर ,वारागुङ मुत्तिक्षेत्र गाउपालिकाले क्वारेन्टाईनलाई चाहिने सामाग्री स्थानीय स्तरबाटै जुटाएको वारागुङ मुक्तिक्षेत्रका अध्यक्ष फेञ्चोक छेप्तेन गुरुङले बताए । उनले वारागुङमा प्रसिद्ध धार्मिक स्थल मुक्तिनाथको भारतीय दुताबासले बनाएको धर्मशाला र कागबेनी धर्मशालालाई क्वारेन्टाईन बनाईएको जानकारी दिए । वारागुङको क्वारेन्टाइनलाई झारकोटका स्थानीय पाल्गेन गुरुङले ईमजेन्सी ब्ल्याङ्केट उपलब्ध गराएका छन् ।
घरपझोङले पनि क्वारेन्टाइनलाई चाहिने सामाग्री खरिद गरेको स्वास्थ्य संयोजक कर्ण थकालीले बताए । क्वारेन्टाइन व्यवस्थापन गर्न नेपाली सेनाले सहयोग गरेको उनले खुलाए ।
म्याग्दी र मुस्ताङ सिमानामा लक डाउन भएपनि सोर्सफोर्सका आधारमा नया अनुहार भित्रिने गरेकाले यसमा पालिका र स्थानीयले पनि थप निगरानी गर्ने अध्यक्ष बुद्धिप्रसाद शेरचनले बताए । उनले नया अनुहारलाई सिधै जिल्ला पस्न नदिने बताए ।
प्रतिक्रिया दिनुहोस !
